【独家】红馆音乐会用散聚为题 RubberBand澄清冇散Band打算
2021-03-22 23:28 
RubberBand（RB）相隔9年宣布第二度在红馆举行音乐会，将于4月3日至6日举行一连四场《RubberBand Ciao 2021》。RB今次以意大利文「Ciao」作为演唱会主题，因近期大家都面对着散聚问题，而且事情发生得好近。不过，当这主题一出，即有不少人怀疑他们有意散Band，他们澄清并无此打算，只是对香港现况的感受。撰文：杜淑霞 摄影：张咏森
6号解释用意大利文「Ciao」做演唱会主题，因这个字包含了「你好」及「再见」的意思，正正切合大家最近面对的散聚问题，「出现呢个音乐会名之前，我哋已经好同步觉得想讲聚与散呢个感觉，点解会有呢样嘢出现喺我哋脑海？正正系因为我哋自己都会好坦承咁样问自己『你能唔能够叫个骚做，给你正能量音乐会？』唔得罗！好难讲得出口，我哋面对紧个时代正正系好多散聚嘅事情发生紧，尤其系呢两年。自己同阿泥当下未必好埋身去谂呢样嘢，但系身边真系有不少朋友经历紧。早轮我都同太太farewell一啲朋友，会觉得呢样嘢牵系住我哋个心，所以会有呢个主题出现，但都希望正面啲去讲。」
疫情下开骚大挑战
讲到散聚，阿伟坦承有朋友以为他们打算散Band，「我哋今次会用到呢个题目『Ciao』，收到好多人朋友都会问系咪散Band，所以讲再见，我可以几肯定话畀大家听唔系散Band，虽然今日唔知听日事，至少我讲呢刻都冇呢个打算。其实散Band真系好细件事，对比我哋想讲嗰样嘢，特别过去两年好多人想离开香港，或者唔情愿离开，点解呢？我相信选择移民，绝大部份系想留低同埋好锺意呢个地方，所以好唏嘘。」
对于在疫情下开骚，RB坦承要学识用平常心去面对变化，所以已有心理准备音乐会有机会延期，「我同阿泥成日讲唔好大喜大悲去面对所有嘅转变，有咗呢个心态，咁史无前例喺疫症之下开嘅音乐会，系好好帮自己打咗个底。」不过筹备期间亦有一定挑战，泥鯭说：「𠵱家入座率唔可以多个50%，budget嘅控制会头痛过之前，呢个肯定系最紧要嘅挑战，而入座率会影响成个骚气氛，对于观众同埋表演者都系，不过好彩我哋惯常做骚唔会好哗众取宠形式。」
最新回应