【独家】《口罩小姐》保锜全程有份 ERROR爆决赛为影帝改期让路

2021-03-18 20:01

ERROR孭飞选美真人骚《最后一届口罩小姐选举》下周推出，有指TVB为此变阵，令节目更令人期待。节目由ERROR四子负责做导师，各自带领5个女仔接受挑战，其实节目已完成拍摄，只馀下决赛直播，而早前因负面新闻多多宣布自罚暂时离队思过的保锜，队友透露到时决赛照样会出席，肥仔更踢爆决赛直播日期更因阿Dee要跟两大影帝合作而被迫改期。撰文：杜淑霞摄影：谭壹致服装：MisterGentleman

今次节目破天荒戴住口罩来选美，肥仔、193同阿Dee话初选㨂人时已有难度，肥仔说：「件事其实好公平，我哋猛问监制你有边个锺意，打粒星嚟，佢就话你哋自己拣啦，后尾我哋foul咗佢锺意嗰啲，佢好鬼嬲，哈哈！」三子谓，到之后每round要foul人，绝对是人生交叉点，肥仔更爆193劲夸，竟搞到流下男儿泪，193：「真系好难做选择，我唔知点样形容，真系建立咗感情，唔忍心！大家好珍惜个机会，但系你令佢冇咗个机会，可能佢好需要嗰个机会。」

三子透露节目由1月开始拍，已由20位参赛者，选出8个进入最后决赛。至于早前因「偷食沙律」张沛乐兼不忿被嘲「少年八両金」狂爆粗闹网民，令形象受损怕连累组合名声，决定认衰宣告暂别的保锜，全程有份拍外，在4月11日直播决赛当晚亦会参与演出。193解释：「唔可以咁冇合约精神，同埋好多节目预咗佢改动唔到。」阿Dee补充，「仲有个《ERROR自肥企划》拍紧，应该4月中播。」

对于这个节目，原来保锜影响未算太大，肥仔爆因为阿Dee决赛更大镬，「为阿Dee改咗日期罗！」193寸爆补充，「爆真嘢呀！（Dee低头劲尴尬）阿Dee系将我哋电视台嘅schedule直情变咗，佢系一哥当之无愧，本来定咗一日，但系因为佢要拍嘢要转过一日做Live show。」阿Dee解释：「我要拍电影《金手指》，我系两难个位，一系叫嗰啲影帝改期就我，一系叫电视台改期就我。」193再窒他：「畀我直情唔使谂，电视台咁为我喎！培养我出嚟，我一定系就电视台先。」肥仔补多句，「啱呀！我撑你！（边同193握手）Dee哥你知唔知最担心咩呢？你改完期之后，全套戏只系出现3分钟。」193更直指《口罩小姐》将会是阿Dee在ViuTV遗作。