【独家】参加《造星III》认清演员路 KiKi荣幸有机会做姜涛妈咪

25岁的KiKi（张凯娸）参加《全民造星III》虽然在30强止步，但她认为这次比赛得着甚多，除了令她识到好多真心朋友，当然还包括跟KLAU（刘瑞祈）挞着进展成拖友，最重要是认清自己未来的演员方向，她直言好想趁后生拍青春剧，对于早前拍ViuTV剧《太平纹身店》饰演姜涛妈咪，她更笑言感到好荣幸。撰文：杜淑霞　摄影：谭壹致 服装：Alice&Olivia 发型：Alex So@The Attics 场地：The AIR (The ONE)

KiKi最初原来冇胆又想挑战《造星III》，全靠公司鼓励，「本身好想参加呢个比赛，但我又好惊，系公司鼓励我，相信我有潜质，叫我去参加。」后来幸好有同门的ANSONBEAN做伴，「最初惊担心自己能力上有不足，同埋觉得孤零零冇人陪，入咗围就知有ANSONBEAN，个心都定啲有个照应，同埋好proud off公司有个咁劲嘅弟弟。」


自责偷偷喊


对于KiKi来说，参赛以来最困难的地方就是跳舞，「如果Zeno话自己系灾难级，咁我系世界级灾难，我真系唔识跳舞，我自己心理压力好多，好紧张，但我有演戏底，唯有尽量去模仿，攞能量出嚟跳到好enjoy咁，但系点跳都唔及佢哋好睇。」虽然同门有跳舞出名劲的ANSONBEAN，但KiKi笑指自己资质太差帮唔到手，不过她承认参赛后跳舞确实有进步，至少记step快手很多。



KiKi认为《造星III》就好像娱乐圈缩影，最难得能够在比赛中认识真心朋友，「你冇谂过毕业后，工作都可以识到一班真心朋友，呢样嘢真系最开心。我最开心遇到彭秀慧，我本身好欣赏呢个老师，佢唔单止系我哋item嘅导师，佢仲教我点样做人，令我挑战自己，亦都知道自己能力系好不足，自己兴趣喺演戏度，认清自己锺意啲咩，呢个喺我事业方向有好大得着。」

恨拍青春剧

完成了《造星III》后，KiKi更加清楚自己应该走演员路，而对于角色她亦有好多想法，「我一直都好恨，好想做一啲青春爱情题材嘅女主角，譬如好似《想见你》嘅柯佳嬿咁，自己都25岁，趁住自己着校服仲似就拍咗佢啦！哈哈！同埋柯佳嬿个角色唔系好单一，系演紧两个角色，会有好大发挥。另外，人格分裂嘅角色，多重人格角色，我都觉得好好玩。」

最近KiKi先后「嫁给男神」Lokman（杨乐文）＠MIRROR和朱鉴然，对于在ViuTV剧《太平纹身店》和广告跟他们合作，她都觉得相当难忘，不过最特别反而能演姜涛妈咪，「有睇《造星》1、2集，Lokman舞台上好Charm，合作后发觉佢好平易近人。其实知道姜涛系我嘅仔仔时，我系吓……，我要做姜涛阿妈！？有冇咁老呀！但后来知冇对手戏，唯一系佢对住我遗照奉茶，我觉得is my pressure！哗！姜涛斟茶畀我饮呀！作为妈妈好安慰呀！哈哈！」提到阿朱KiKi一样有赞冇弹，「佢好健谈，佢拍广告都好专业，只系见膊佢都交戏畀我，等我可以快啲入戏。」

惨变第三者

讲到跟KLAU拍拖，KiKi解释两人早在《造星III》前，她参加ViuTV《对号入座》透过KLAU好兄弟阿神（曾赞学）等人介绍认识，不过她笑指自己只是KLAU和阿神之间第三者，「佢哋成日话我系女版阿神，因为阿神都系白羊座。（原来系因为锺意阿神先锺意你？）系呀！我只系阿神替身，我唔够胆同阿神斗啦！佢梗系正室啦！我呢啲介入佢哋关系㗎咋！但系我唔甘于做第三者，要畀个下马威阿神。」


跟KLAU认爱后KiKi认为反而有好处，「𠵱家发展落去大家都好舒服，呢样可以系我哋嘅弱点，亦都可以系我哋优势，有种互补不足作用，佢系歌手我系演员，大家一齐喺作品上同工作上交流，佢教识我好多嘢，同时间我都畀到啲意见佢。」至于被影到煲烟，KiKi承认作为公众人物会注意，「讲真唔怕形象受损，我系演员唔系偶像，冇乜偶像包袱，都唔怕影响形象，虽则咁讲，但身为公众人物，都应该注意吓。」KiKi还预告将会跟KLAU有合作计划，「我哋都想音乐上面会唔会有啲火花？应该好快会有cover会出。」