【独家】拍《黯夜守护者》江嘉敏「倒」屎寻仇袁文杰硬食新年第一桶「金」

2021-03-09 19:42

去年底啱啱同拍拖9年女友张洁莲拉埋天窗的袁文杰，踏入牛年即刻再有喜事发生，日前为新剧《黯夜守护者》开工，竟然收到新年第一桶「金」。当日剧情讲袁文杰得罪江嘉敏等人，结果被买凶攞桶屎照头淋，虽然系拍戏，但新正头要俾屎淋，不过杰哥完全唔介意，淋完屎仲好鬼风骚，摆晒型仔甫士任影，仲好正面咁话：「新正头淋桶『金』落去，冲走晒唔好嘅嘢。」「周身屎」的杰哥，仲鬼马周围搵人揽，吓到江嘉敏同李国麟鸡飞狗走。撰文：杜淑霞摄影：梁志明

这场淋屎戏朝早在湾仔横街拍摄，贪够静少路人，杰哥一身斯文裇衫西裤look到场，他谓事前冇特别准备，亦不介意新年流流俾屎淋，「我觉得凡事要从唔同角度去睇嘅，如果从乾净嘅角度梗系唔好，我哋可以谂新正头淋桶『金』落去，冲走晒唔好嘅嘢。我呢套戏好得意，我仲有一场戏都系俾嘢照头淋。（嗰次淋咩？）淋油，都几好玩。」

搞笑试食「屎」

由于拍摄机会只得一次，所以导演要求杰哥和负责淋屎的罗浩铭先排练几次，试准位置后正式拍摄，顺利一take过完成。拍完杰哥仲搞笑试食「屎」，他笑言：「感觉好难形容畀你听，不如你试吓！但其实好有营养，有啲香蕉同面根，仲有朱古力奶。新年第一桶『金』，好痛快！我期待咗好耐，但永远嗰刻好快过咗去。」剧中杰哥饰演陈炜男朋友，究竟点解会搞到俾人淋屎咁大剂呢？他就解释：「我个角色好斯文，好正常做生意，同我平时个look好唔同，哈哈！但始终唔觉意出咗啲意外，可能得罪咗啲人，所以就俾人哋追数，我就理直气壮冇争人哋嘢，但人哋攞唔到，咪请你食桶『金』罗！」

杰哥笑指得罪了江嘉敏等人，结果被买凶寻仇，仲笑指条屎桥是江嘉敏负责度，但江嘉敏就否认，「我唔系罪魁祸首，我系帮我打机嘅师父仔（杨凯博），因为佢得罪咗师父仔，我先淋……黄金喺杰哥度。（杰哥话你谂埋啲屎桥？）唔系我谂，我系负责行动㗎咋！好似本嚟系我负责淋，但唔够大力要NG几次就唔好啦！执「金」系好事嚟，成身『黄金』喎！我都系第一次拍玩『黄金』嘅嘢，原来有份睇都几刺激。」嘉敏今次饰演陈敏之18岁女儿，「点解我要剪齐荫，就系想后生啲，因为我有反社会人格，望落去好可爱，反差大啲。我最多戏对手系14岁嘅小朋友（杨凯博），第一日开工佢问我姐姐系咪属狗，原来佢都系属狗。（大佢12年？）我哋同年㗎！（沟通得好，你幼稚定佢成熟？）可能系我有两个妹妹，我当佢好似细佬咁。」