【维港会】今日惊蛰打小人 港人冀打走新冠病毒

今日惊蛰，系农历二十四节气嘅第三个节气，湾仔鹅颈桥又会热闹起嚟，啪、啪、啪，打小人之声四起。喺鹅颈桥底嘅打小人持牌人红姑话，近期有人嚟要求打新冠肺炎病毒，希望用拖鞋底打走呢只衰嘢，令香港人嘅正常生活快啲回复正常喎。人同此心，唔该红姑大力啲打落去。

有多年打小人经验嘅红姑话，以往多数系女士嚟帮衬打小人，多数涉及感情事，要求打老公嘅小三，但近一、两年经济唔好，多咗人要求打小人、保就业，即系想公司里面啲小人绝迹，令自身工作安稳啲。近排最新嘅打小人目标，就系新冠肺炎病毒嘞，有人专程嚟要求红姑狠狠咁打只病毒，求打走佢，香港经济快啲好番，世界回复平静，小妹都希望系咁就好啦。

讲到生意，红姑话过去一年几无咗游客，生意淡薄，平日甚至「食蛋」，但惊蛰系旺日，佢预咗今日打小人打到通宵。


农历惊蛰，意味春天时节开始，天气将会明显变暖。天文台就预测，今日大致多云，有几阵雨，稍后有薄雾，气温介乎二十度至二十四度。