【独家】恨追牛Ｂ 符晓薇投诉唔够勤力造人嘥卵 陈柏宇呻：唔通晚晚做呀
2021-03-02 20:06 
陈柏宇（Jason）17年跟符晓薇（Leanne）结婚，翌年诞下囡囡陈羿辰（Abigail），一切以囡囡为先，可惜遇上疫情被迫经常匿埋屋企，踏入牛年他们最想囡囡可顺利返幼稚园。Abigail太得意，两人都想牛年追多个，不过Leanne去年中切除左边输卵管，令受孕机会大减，唯有每个月计住排卵期造人，令Jason大感压力。两夫妻访问时不停互窒劲耍花枪，睇嚟好快有好消息啦！撰文：杜淑霞 摄影：谭壹致 形象：Queenie Yu(Jason) 发型：Alex So (the attic)(Jason) 化妆：Jessica Chan(Jason)
陈氏夫妇觉得鼠年对小朋友影响特别大，Leanne说：「我哋不嬲都冇谂住畀Abi（囡囡昵称）读M班，谂住佢未返K1就同佢去旅行，学多啲、睇多啲，用眼睛去自己感受，但系冇得飞，佢见到小朋友好锺意，就决定畀佢返学前班玩吓。」不过Jason认为这段日子也有好处，「唔出得街，少咗工作多咗思考机会，又多啲同屋企相处机会，唔系all bad嘅！」
Jason早前自爆受疫情影响搞到快要乞食，他承认入不敷支，使紧之前积储。Leanne说：「我谂呢一年个个都系咁！（陈：你唔系呀！）」讲完两夫妻相视而笑。Leanne即识做狂赞老公，「爸爸比较大压力，爸爸搵嘅钱要攞嚟养屋企，我搵嘅钱冇话要摆喺屋企嗰边，爸爸呢样嘢好好㗎！」Jason听完仍忍唔住呻，「我唔想㗎！（老婆揽住他笑得劲尴尬）其实我冇得拣咋！我梗系想你帮吓手照顾吓屋企啲起居饮食啦！（符：乖！乖！）」
两公婆俾囡囡冧爆
踏入新一年，两人最想Abi在9月顺利返幼稚园，Leanne说：「上zoom对咁细个小朋友唔见效，呢个年纪好多嘢系感观性，唔想佢喺K1都系对住部电脑，同埋佢share嘢好差，乜都话is mine。」不过两人都有俾Abi冧爆时候，「佢挂住你嘅时候，去接佢放学系会喊。」Leanne爆其实Jason好享受同Abi这种重逢情景，「佢enjoy《蓝色新生恋》咁！而我有日换完衫去做嘢，Abi话mummy you are so pretty！我哋喺度狂笑。」超得意的Abi，令两夫妻想再生B，可惜Leanne去年中怀第二胎后，因宫外孕致输卵管爆裂，要切除左边输卵管令受孕机会大减。Leanne说：「边有努力过！（Jason鬼马做被鞭打动作）老公同我讲唔好咁大压力畀佢！我都唔知努力呢个字，衬唔衬得起喺我哋身上！（陈：你想点呀？晚晚做呀？！）我惊miss咗个黄金时间！（陈：你成日计住个黄金时间已经系压力啦！）嘥气！浪费我青春呀！有一个月我真系好嬲，成日miss咗黄金时间，浪费紧我啲卵呀，哈哈！」不过，快将38岁的Jason坦承只会追到40岁，因不想跟小朋友年龄相差太远，但生仔定女都冇所谓。
最新回应