【独家】拍戏以来最大考验 栢天男被谭耀文拮手指痛到发恶梦

由麦浩邦执导，谭耀文、张继聪、栢天男（Adam）和张建声主演的电影《逃狱兄弟》受疫情影响，上映日期延迟了两个多月，直至2月25日全线上映，众台前幕后等到颈都长埋，尤其孭重飞嘅Adam更甚，片中他被拳打脚踼、扯头发、更被狱中巨头阿谭「心口碎大石」，其中一场边挣扎边被拮手指场口，因意外受伤流血，痛到Adam发恶梦！ 采访：方骞平 摄影：谭壹致 发型：Jobbylee@Leighton Aveda(张继聪)、DY@ salon de Lotus(栢天男)、Simm(张建声) 化妆：PinkyKu(张继聪)、 Rainbow @ Annie G. Makeup(栢天男)、Yvonne (张建声) 场地：JAS Party&Studio

《逃狱兄弟》用逃狱做题材，饰演囚犯「新丁」嘅栢天男喺监仓惨被虐打，除咗被压落地，用磨尖咗嘅牙刷拮手指、扯头发欺凌外，仲被谭耀文以铁锤隔著木板大力殴打心口，另冲凉时，被张建声入去揸下体。导演明「醒」Adam，麦浩邦笑住解释说，「因为入狱前佢系一位年轻才俊，佢咁高大靓仔，最有说服力。」


Adam坦承系拍戏以嚟最大考验一次，但见每位男演员都咁有勇气，惟有豁咗出去，「我相信佢哋个个都会锡住我，唔会打面…咁多！最难忘拍『心口碎大石』场口时，我叫谭耀文唔好留力，咁先拍到有火花；而拮手指嗰幕戏，意外地变咗假戏真做，真系刺伤流血，痛到我发恶梦，重现呢个画面。」

至于张继聪及张建声异口同声大赞身形Adam最掂，张建声笑说：「嗰场栢天男冲凉戏，我要入去搞佢，『甩』过佢八筒(腹肌)，我个Body同佢冇得斗呀！」对此，Adam笑说：「你哋个个都咁有型，我只好摄位去证明自己啦！为咗拍呢场戏，我狂操肌，仲要系咁食蛋白质。」片中阿聪反而系人生最肥时期，体重接近200磅，睇返肥佬跑姿连自己都唔认得，而他最惊一幕系逃狱时吊喺一楼高嘅道具通风管，因为重量问题，风管顶两边摆动好牙烟，真系拍紧有血有汗嘅辛苦戏。