【独家】为家人瞓觉照戴口罩陈豪离港靠锡mon解相思

2021-02-25 19:00

陈豪（阿Mo）最近在《陀枪师姐2021》演「懵Sir」，但现实中他绝对精明，锡老婆仔女并非单靠搵钱养家，疫情下出席公开场合外科口罩永不离面，连在家瞓觉也全程戴住，为保护家人几辛苦都冇计。不过即将要到内地为新剧《白色强人II》开工的他，首次跟家人长时间分隔两地，他预计同家人视像会狂锡个mon解相思。撰文：杜淑霞摄影：谭壹致服装：中艺、Theory

阿Mo在01年拍过《陀枪师姐III》演大奸角「陈耀扬」，今次再拍同系列变成可爱阿Sir，不过他认为仲难演，「喜剧其实好虾人，一多就over，一少就唔足够，好靠演员摸到观众嘅路线同笑点。」但幸好拍住默契十足的宣萱，「佢系个好照顾身边所有人嘅人，一个大好人，佢今次仲教我化妆同美容，又帮手畀意见啲新人。」

提到早前在《万千星辉颁奖典礼》全程戴口罩获赞，阿Mo认为这是最基本可做到，「冇人怪你做多，只有怪你做少，喺呢个时间防疫意识系紧要。你话我谨慎，我其实唔止㗎！我连瞓觉都戴住，喺屋企都戴住你咪知道罗！因为我拍戏有好多人，又成日周围去，我唯有返屋企就换个新嘅口罩，全程戴住除咗食嘢。」但仔女有时会话：「爹哋好耐冇见过你个样。」但他有将防疫意识灌输给小朋友，令他们乖乖戴口罩，「对细路仔要当佢大人咁对待，要同佢解释发生咩事，点解唔使返工返学，咁佢哋就唔会扭计。」

早前陈茵媺贴出细女Camilla见到爹哋即咀mon的得意相，原来有机会案件重演，因阿Mo在3月要去深圳拍《白色强人II》，要隔离而逗留时间特别长，「计埋拍要逗留两个半月，冇试过咁耐冇见佢哋。」平日跟家人黐到实的他，已预告畀小朋友知，「要早啲讲畀佢哋听，知道几时要走心理压力冇咁大，好似睇电视睇多5分钟，唔好即刻熄咗佢，畀啲时间佢哋准备吓。佢哋梗系话爹哋唔好走，见你出门口就话爹哋你走啦！哈哈！到时唯有靠视像罗！」笑他到时仔女疯狂锡mon之馀，他可能锡得最劲，他点晒头：「无错呀！」