【独家】出炉视帝视后捱夜覆贺电 王浩信蔡思贝牛年期待拍喜剧

王浩信继18年凭《踩过界》夺得视帝后，最近跟蔡思贝再凭《踩过界II》成为出炉视帝视后，两人得奖后除了忙捱通宵狂发讯息答谢身边人外，亦不忘谂点样令自己进步配得起个奖。鼠年夺奖大旺的他们，踏入牛年两人目标明确，希望用更多好作品报答观众，不过两人对演喜剧都特别期待，浩信恨大受欢迎的《反黑路人甲》能拍续集，而即将拍跟王祖蓝等首度合作古装喜剧的思贝，就希望跟祖蓝偷师学做喜剧演员。撰文：杜淑霞 摄影：张咏森 发型：Sue Cheung@saloon festival walk(浩信)、@zaptang(思贝) 化妆：Henry Li(浩信)、@stephenmakeup(思贝) 服饰：SANDRO HOMME及Theory(浩信)、Max&Co.及DOLCE&GABBANA(思贝)

思贝坦承得奖后感觉一直未很踏实，更立即思考点样对得住个奖，「当然攞完系开心，亦都觉得好荣幸，因为系一个肯定嚟㗎嘛！亦都系呢7年、演艺路上比较大嘅里程碑，反而更加唔可以松懈，2021年带住呢个名衔点样过呢！？」而为了答谢一班7年来支持她的朋友和工作伙伴，思贝更捱足一晚通宵到翌日下午1点半，「我有谂过返屋企瞓咗先，但我知道我瞓咗觉起身个感觉冇咁浓烈，所以我真系返咗屋企坐低，静静地谂嘢加覆message，反而每个人我睇住佢个名回顾返呢7年嚟辅助过我啲咩、帮过我啲咩，或者喺我生命里面做过啲咩作用，我想谂番啲回忆出嚟同每个人讲番我对佢嘅感受，多谢佢哋。」



相隔3年再凭「盲侠」夺视帝的浩信，令他更清楚未来方向，「其实第一次攞好似思贝头先咁讲，谂住做咩！？谂咗都几年，其实我想做咩啫？想做演员罗！就系咁简单咋嘛！咪演好啲戏罗！今年再攞其实最开心系见到一班兄弟姐妹大家都有奖，大家一齐奋斗咗呢几年，《反黑》入面咁多个角色攞奖。」而他跟思贝一样狂覆message而捱眼瞓，「我都有覆到好夜，我都好想多谢每一个send message畀我嘅朋友，仲要系全部系写一篇嘢，所以趁住感觉上浓烈时多谢咗人哋先，观众喜爱同埋朋友支持呢啲唔系必然，都值得珍惜同多谢。」早前接受《头条》访问时，浩信已透露对《反黑》有少少偏心，想不到他认为夺奖也关「张细伦」事，「今年我觉得系《反黑》加埋『盲侠』一齐，先会有咁嘅肯定，绝对唔可以忽略咗『张细伦』。」

期待同王祖蓝合作


不过，听见浩信咁讲，竟然搞到两辑《踩过界》拍档思贝呷醋，「佢同张振朗分别自从有《反黑》之后，嫌弃《踩过界》!」浩信即澄清，「又唔会！（这时背后挥春掉下）你睇讲错嘢啦！挥春都跌埋落嚟呀！」但思贝都承认是《反黑》粉丝，「集集都有拍手掌嘅位，但全部啲位都冇你份嘅！（王：哈哈！多谢你支持《反黑》！）」


讲到牛年愿望，浩信一样离不开《反黑》，「希望疫情快啲过去啦！可以再去到唔同地方，同唔同嘅观众多啲交流，试吓唔同嘅平台、电影、音乐啦！希望大家身体健康，希望发一个少少嘅愿可以实现，希望2021年所有读者朋友都会更加好，更加正面。我自己就继续抱住我想做一个演员嘅心态，去继续做好我嘅嘢。希望《反黑》有个延续，希望《反黑》同埋《踩过界》都有，不过《踩过界》有延续机会大过《反黑》，同埋今年都有套剧推出叫《刑侦日记》，其实对我嚟讲都系一个里程碑嚟，演戏上面系个好难演角色，一个多重人格角色，同红姐（惠英红）系一个好开心好开心合作，希望呢套都系畀观众留下印象嘅剧集。」


至于4月才开拍跟王祖蓝的古装新剧的思贝，就想趁空档好好学习及吸收养分，「我会上吓普通话堂，唔可以咁儿戏去做访问㗎啦！我𠵱家好似连弹琴都唔识弹咁，其实我考咗8级，唔可以嘥咗佢，呢段时间会睇多啲书同戏，有空档可以更加任性煲通宵一日睇几套戏，喺唔同范畴吸多啲嘢。」而她亦就好期待跟祖蓝合作，「因为真系可以喺佢身上学好多嘢，佢啲急才转数快各样嘢，我都想睇吓佢点样去写个剧本出嚟，好多嘢可以学到，好似嗰阵时《大帅哥》拍张卫健一样。」