《姊妹淘》主持互数缺点 张宝儿被爆经常「消失」

庄思敏、张宝儿、蔡嘉欣、陈诗欣与主播许文轩（Edmond）齐齐拍摄TVB娱乐新闻台贺年特辑，适逢牛年，众人特地亲亲牛牛玩自拍，又同Edmond玩水上单车，更大爆《姊妹淘》主持成员缺点，希望新一年有所改善。

蔡嘉欣直指张宝儿经常「消失」，笑说：「传短讯畀佢几日先覆！唔开心时又收收埋埋，唔话畀人知！」张宝儿回应时亦表明不满意自己这方面，说：「我唔系一个主动融入群体生活嘅人，好多时候佢哋搵我出嚟同Message我，我都会Miss咗佢哋嘅聚会。嚟紧我出嚟多啲，会睇佢哋啲Message，真系要好好珍惜佢哋！」
嘉欣又表示陈诗欣讲话时「好恶」！嘉欣笑说：「唔好睇佢个样公主咁款！佢对男友超恶，食住男友，希望来年可以温柔啲！其实我都有俾张宝儿话我讲嘢太直接，又俾庄思敏话我讲嘢太快，所以新一年都要改善下。」

陈诗欣说：「叫庄思敏唔好成日请我哋食嘢！（其实系咪攻心计想整肥你哋？）系Edmond你讲架！唔关我事，依家佢多咗一个缺点！」庄思敏亦不甘示弱，说：「其实我好怕Part佢，因为佢好瘦，我喺佢隔离，个个都话我肥咗！张宝儿就成日补妆，依家好啲，不过多咗个缺点就系成日漏嘢，佢会成日漏低化妆品喺厂。」

谈到生B问题，庄思敏和张宝儿不约而同表示不心急。庄思敏说：「因为疫情同老公分隔两地，冇见咁耐，各自努力事业先，打好基础，希望见面时就可以把握时间一齐，去下旅行，想Keep住爱情拍拖嘅感觉。」陈诗欣笑说：「结婚随缘啦！自从好友余香凝结咗婚，真系多咗人问我。其实公开咗拍拖都系好事，话畀大家知我系有男友，因为之前真系好烦，实在有太多男仔追求我！哈哈！」