【独家】同刘浩龙食面被大婶撩唱歌　陈奕迅心情靓爆任影唔嬲

疫情致停工近1年的陈奕迅（Eason）去年自爆几乎零收入，即使早排出新歌，他亦冇机会喺公开场合做宣传，只能长期Stay home抗疫。今日（3日）下午2点半，《头条日报》记者撞到Eason同刘浩龙（师兄）喺大坑炳记茶档食Lunch，二人甫坐低便迅速叫了面及奶茶。食饱后，一向有「吹神」之称的Eason，同师兄继续坐喺大街密密斟，前者仲不时笑到眯晒眼、拗晒腰，心情靓爆！逗留约半小时，准备离开的两人被不少食客及途人认出兼索合照，虽然疫情严峻，但Eason都冇托手挣，即时戴番个口罩同粉丝「零距离」自拍。

埋单后，Eason到附近买西饼再返回洗车屋取车，与职员相熟的他本来想畀钱，但却遭对方婉拒，搞到Eason唔系几好意思，一边行上车一边狂讲多谢，忽然旁边的绿衫大妈大叫：「唱首歌嚟听吓啦！」Eason闻言即爆笑，当然最终一句都冇唱就闩门走人。采访：张咏森