【独家】露腰兼巨窿裤行街唔怕冻亲 17岁沈日带老友去老窦铺买衫

邱淑贞有个被誉为「最索星二代」的饼印大女沈月，虽然得19岁但已在伦敦时装周行过Catwalk又上过时装杂志封面，甚至为老窦代理嘅潮牌做生招牌，由细到大都备受关注。相反，以学业为重的17岁胞妹沈日就低调得多，早排连IG都删剩一个Po。《头条日报》记者早前于铜锣湾撞到沈日，一向有Baby fat的她愈大愈识打扮，当日着露腰兼巨窿裤陪朋友去老窦铺买衫，虽然十多度凉凉地但为咗靓唔怕啦！采访：梁志明

童年沈日留短发又锺意男仔头打扮，踏入青春期就一改风格，留长发兼成日着背心、短裙仔，渗出浓浓少女味。早前约傍晚6点，沈日与闺密现身百德新街逛潮店，当日一身「华Dee全牛Look」的她，以白色Crop-Tee打底晒小蛮腰，下身穿巨窿Boyfriend Jeans就若隐若现露出纤幼大腿，打扮愈嚟愈有星味，扎起All back高马尾的她虽然戴住口罩，但眼仔圆碌碌，一眼就认到系90年代女神邱淑贞个二公主。

行一阵就买到嘢

去到百德新街，身为I.T太子女的沈日梗要带Friend落老窦代理的潮铺「巡」吓，只见两人去咗Acne Studios睇衫，睇咗一阵已拣啱心水，话咁快就入手大袋战利品，之后再去到OFF-WHITE睇衫。甫进店，朋友仔即向店员展示手机中的图片，询问有冇其心头好，估计店内刚好冇货，职员即拎出iPad向她们介绍其他新装。结果兜了10分钟都系冇收获，离开该店后，沈日Join埋闺密的男友在街头吹水，见一对小情侣搭膊兼揽揽，顿成「电灯胆」的她即低头揿手机，之后3人齐登上坐驾离开。