【独家】「TVB最索丫鬟」离巢做网红 陈婉婷直播吹水月赚万元唔后悔

因为黄心颖，TVB剧集《坚离地爱坚离地》存仓3年先可以重见天日。剧中饰演女仆，入行十年，身高5尺3寸，腿长38寸，有「最索丫鬟」之称嘅陈婉婷(Hebe)获网民赞可爱，不过观众暂时都唔会再喺TVB见到佢，事关佢喺19年已离巢外闯，「离开都系想出去闯吓，唔想再做妹仔、姣精、宫女、婢女等花瓶！」因为疫情严重影响收入，Hebe被迫做网红靠直播自救，但佢话从冇后悔离开大台。采访：方骞平 摄影：谭壹致 场地：南瀛水产

陈婉婷喺《坚离地爱坚离地》演网红Carman，并以女仆装示人，有场戏指导黄心颖点样去摆甫士再发嗲功电男人，但戏中嘅心颖搞唔掂：「《宫心计2深宫计》后第二次同黄心颖合作，好彩佢哋都好信任我，知我做咗好多功课，为咗演好女仆角色，我真系有去女仆Cafe帮衬，学佢哋每次放低食物都会念魔法咒语，见到客人又会用日文讲『主人』、『欢迎主人返嚟』等。」Hebe眼中，黄心颖为人爽朗，好Nice，容易同人混熟：「因为同场全部都系女仔，所以唔觉佢好嗲。」

直播网民叫除衫

Hebe冇咗大台做靠山，疫情初期收入大受影响，被迫转投直播行列自救：「收入全靠观众打赏，我好『孤寒』唔会性感现身，又唔会当佢哋系『水鱼』系咁揿礼物，而系透过直播交流，观众发觉我真系好锺意做戏，好想帮我维持生活，实现梦想。」虽然有知名度，但Hebe坦言艺人做直播难过素人，「除咗有『说话』听，好多观众觉得艺人咁巴闭唔使送礼物啦，最初由零晨12点开到朝早9点，通宵直播都冇人睇。试过有网友要求我除衫，或者闹我系丑样阿婶，甚至有个控制狂，送完礼物要求我做直播陪到佢瞓著为止，同埋唱一啲我唔识唱嘅歌，当我踢走佢之后，佢再开新帐户入嚟投诉我，开直播攰到燥燥哋，畀人咁闹真心嬲。」

最差月入几百蚊

陈婉婷自爆月入有万几蚊已经好多，悭住用都可以维持到基本生活开支，最差时连一千蚊都冇：「本身想搬出嚟独居都要挞订，不过，我又冇后悔当初离开舒适圈，因为我想试多啲唔同嘅嘢。𠵱家系自由身，同ViuTV以部头形式合作，农历新年会播出真人Show《家务战场》。另外，排紧期上映嘅电影《黑水界》首当女主角，片中有突破性演出，系挑战全祼冲凉戏，不过，镜头前只见侧身，基本上乜都睇唔到，最吸引反而系个角色好阴沉，有好多内心戏发挥，我怕做唔到，拍摄前个几月都唔接job，匿喺屋企入戏。」