叹台湾拍剧冇女埋身 姜涛睇好《造星III》Manson

男团MIRROR成员姜涛今日出席商场活动，疫情下仍吸引近百姜糖（姜涛粉丝名）捧场，场面热闹！11月在台湾拍完剧返港后便工作不断，姜涛表示：「我不太清楚收入，都是阿妈帮手理财，感激疫情期间仍有工作。（队友会否妒忌？）不会啦！MIRROR的工作量都几好，各有各忙，生活咁无趣，就算冇工作也会自我增值，例如我也有学唱歌跳舞，哈哈！」

问到就快圣诞，会否识个女朋友令生活有趣啲？醒目的姜涛即硬Tag新歌《爱情签证申请》：「没想过，自己也没打算递交签证申请。不过公司冇限制拍拖，只说自己做的事自己负责。」早前姜涛妈咪叫囝囝搵返个台湾女友，姜B又点睇台湾女生呢？「系呀！可能因为妈咪想移民台湾啩，哈哈！台湾人很热情，又很照顾我，男女我都锺意。」他直言在台湾冇女埋身，皆因台湾大把靓仔，自己在当地不入流，相当谦虚！

姜涛是第一季《全民造星》冠军，所以亦有留意《全民造星III》的师弟妹，他睇好参赛者Manson（张进翘），更趁机帮队友Stanley（邱士缙）的女友Alina（李静莲）拉票，大赞呢对情侣身材都好好。姜B又自爆收到花姐落Order，明年要操好身形，向Stanley的肌肉型进发。至于会否够胆好似队友Ian（陈卓贤）及Anson Lo（卢瀚霆）般拍剧除衫骚肌？姜涛说：「我台湾拍《超感应学园》也有除衫戏呀，但冇咁劲。（留返拍港剧再除多啲？）如果有呢一日会开Live通知大家！」