【独家】一家五口玩完水行超市 陈豪陈茵媺教大仔同记者讲拜拜

为咗方便仔女返学，陈豪同陈茵媺由大埔比华利山别墅搬去港岛南湾豪宅，屋企附近就有靓沙滩可以玩水，不过之前疫情严峻，泳滩被封，一家人好守规矩，唔落水斋喺附近晒太阳，最紧要可以畀小朋友放吓电。日前下午，陈氏一家五口又出动，仔女放完电就去行超市，上车离开前，两公婆仲教大仔陈梓烨同记者讲拜拜。采访:张咏森

陈豪一家五口，生活费唔惹少，好彩一家之主好多Job，来年就孭三套大剧出街，包括《爱美丽狂想曲》、《白色强人II》及《陀枪师姐2021》。三个小朋友唔易凑，所以就算陈茵媺有戏瘾都暂时未能复出，唔紧要啦，睇老公啲剧当自己有份拍啦。

一家行超市好温馨
新冠肺炎疫情时高时低，不过对一向喜欢户外活动嘅陈氏一家冇太大影响，系唔可以四围飞啫，但陈豪同陈茵媺都会谂办法带小朋友出去玩，早前就畀人影到佢哋去海洋公园玩。其实平日一有时间，陈氏夫妇都会带小朋友落附近泳滩玩吓沙，当日《头条日报》记者就见到佢哋玩完行去超市买嘢，陈豪拖住二仔陈浩锋行先，陈茵媺就拖住大仔及细女Camilla，工人姐姐殿后。入到超市，陈豪同工人姐姐负责拣蛋同生果，陈太同小朋友就四围睇，行咗15分钟就离开，临上七人车前，陈氏夫妇教大仔同记者讲拜拜，小朋友即做，个拜拜仲好有力添。