【独家】获施匡翘「带挈」入住隔离营 谢高晋觉醒唔好浪费人生

现年27岁，身高6尺3寸嘅谢高晋，从职业篮球员变身模特儿，再成为电影演员，今年更踩入乐坛，出埋新歌《仲夏日记》，唱出追梦理想。之前因为师姐施匡翘及经理人均确诊新冠肺炎，「带挈」他被列为紧密接触者而需要入住骏洋邨隔离，此事令谢高晋有所觉悟，就系今日唔知听日事，提醒他要尽力做好每件事，唔好浪费自己每分每秒。采访：方骞平 摄影：谭壹致 场地：力天世纪 发型：Jessie Lam @ Anchor Barbershop 服装：SMOKEDOG

之前谢高晋喺《头条娱乐》fb专页开live，即席演绎处男作《仲夏日记》，新歌系描写人生有唔同际遇，选择咗就尽力做好，唔好后悔，希望从呢首歌带出正能量。由普通唱吓歌，到真系做咗歌手，谢高晋好感激经理人Apple姐同埋老板的栽培：「老板要求好严格，记得首次入录音室真系好紧张，因为咬字唔好，要逐句逐句咁执，结果录足个几月，试过录到崩紧晒，冇晒精神，连Melody都转埋，真系几大挑战。」

艺人篮球员同步发展
谢高晋16岁就代表香港打篮球赛，到18岁受伤患困扰被迫暂停篮球员生涯转做演员：「当年真系处于人生交叉点，不过都庆幸有机会拍到电影《同班同学》及《大师兄》，直至去年再追梦喺澳门做返职业篮球员，到东南亚作赛，又参加内地真人骚《我要打篮球》晋身15强，暂时都想两边同时兼顾。」对于师姐施匡翘确诊「带挈」他增加了知名度，他即说：「我冇乜点谂，最重要身体健康，希望疫情快啲过，大家开开心心同健健康康，唔使带口罩去见人。不过，今次真系感受到今日唔知听日事，明明当日仲喺屋企，突然话翌日要入去隔离营，都唔知发生乜事，所以做人要尽力把握每分每秒，做好自己。」