【头条戏场】《魔鬼对决》一个黐线佬遇上另一个黐线佬

韩国最新犯罪电影《魔鬼对决》由《白头山：火山浩劫》及《上流寄生族》团队制作，两大影帝黄晸玟及李政宰加朴正民，玩复仇玩血腥玩亲情玩人性。电影好有旧港产黑帮片味道，动作戏好睇，你追我避超紧张，三位演员表现一贯精彩，最重要冇乜废话，睇得好爽，几好。撰文:廖思慧

故事讲述黄晸玟饰演的杀手仁南刺杀完日本黑帮大佬是枝后就金盆洗手退出江湖，一条友去巴拿马过埋下半世。不过黑帮大佬个细佬雷（李政宰饰演）好嬲，发誓要搵个杀手出嚟队冧佢。呢位阿雷好厉害，用尽一切方法去摷出同仁南有关嘅人再问仁南去向，得知杀兄仇人去咗泰国即Follow，然后战场由日本去到泰国。

究竟仁南去泰国做咩?去救人，去救一个9岁小妹妹，一个去救人，一个去杀人，咁样嘅故事点会唔紧张?全片超多动作场面，唔只埋身打仲要无数咁多枪战，嘭嘭嘭嘭嘭到个人好精神，系夸张嘅亦唔系好合逻辑，个笃笃车司机载住阿雷哥去冧友，司机喺枪林弹雨下乜事都冇，仲要揸得手车几稳定，Well。

戏中所有动作场面都由黄晸玟及李政宰亲身上阵，剧组亦安排多部摄影机同时拍摄，以捕捉不同角度，所以拍摄前要不断彩排，黄影帝称：「其他电影嘅动作戏，大部分都系预先排好唔会真打，但今次所有人都系嚟真，拍摄时亦穿上护身工具。其实人体好奇妙，如果喺极度紧张嘅情况下就唔会咁痛。」

至于李影帝就表示：「打斗场面，剧本都写得好简单。只写两人对打，结果拍摄时，可能要面对一次打7、8个人嘅情况。原本以为拍2小时就收工，结果拍咗4日3夜。」

压轴介绍朴正民，鳄鱼头老衬底，开口钱埋口钱，但心地好人又勇猛，为充满血腥味嘅电影加添一点甜。


电影将于myTV SUPER 独家上架
上架日期：2020年10月1日 (myTV SUPER猛片特区独家上架)
费用 ：$70 (观赏期：48小时或至节目最后观赏期限为止(两者以较早者为准)