【独家】爆爷爷大埔曾开著名鸡饭店 港姐谢嘉怡决心跟嫲嫲学厨
2020-09-17 22:55 
港姐早前在疫情下顺利诞生，今届赛果亦少有争议，特别是混血儿冠军谢嘉怡（Lisa），凭住决赛率真表现劲得观众欢心，虽然Lisa在苏格兰出生长大，但原来她家族在大埔相当有名，因为爷爷谢华所开的食肆「桥头鸡—谢华记」曾经冇人不识，Lisa接受《头条日报》访问时，都话好可惜爷爷已过身，冇机会再食爷爷整的鸡，但会好好跟嫲嫲学整中菜。撰文：杜淑霞 摄影：谭壹致
当选冠军后，Lisa的54岁的有型爸爸同苏格兰美女妈咪成为热话，她坦言妈咪看到赞她靓留言好开心，她更透露大家好快会见靓妈真身，「12月1月度，等爹哋返过去再带佢过嚟，妈咪到时会留底陪我，但爹哋会再谂几时返嚟。」
原来在苏格兰做厨师的谢爸爸，父亲谢华早年在大埔曾开著名食肆「桥头鸡—谢华记」，店内鸡饭和鸡粥更是大埔食客名物。跟Lisa提起，她即开心回应，「细个食过，但系我唔系好记得，我记得爷爷（整）啲鸡好好食，嗰时两岁开始每年都会返一次嚟。」虽然爷爷同爸爸是大厨，但Lisa自言厨艺麻麻，「其实我全家人煮嘢食好叻，变到我煮嘢食唔系好叻，人哋煮嘢畀我食，但系我返咗嚟会跟嫲嫲学，嫲嫲煮嘢食仲叻过爹哋，我嫲嫲煲汤好好饮。」
亚军陈桢怡（Celina）参选被网友封为「女版金宇彬」，又被指在英国读书时烂蒲兼爱收兵。对于负面新闻，家人比她反应更大，「参选得都预咗畀人评论，自己都冇话唔开心，睇完就算，反而屋企人会紧张同唔开心，特别系蒲同收兵嗰啲新闻，我妈咪同家姐好担心，成日瞓唔着觉问我有冇嘢。」反过来安慰家人的Celina坦言，「我宁愿畀人话我似男仔，因为我觉得另外嗰啲报导会影响到其他人点睇我人格，真系唔系咁好。」
自爆从未拍过拖的季军郭柏妍（Rosita），决赛当晚见她劲冧胡鸿钧，讲到拣对象，她就想搵个高大有安全感的男友。问到外型是否要似胡鸿钧，她即大赞：「佢系好靓仔嘅。（佢出咗人形揽枕会买个揽住瞓？）big big shop嗰个呀！我谂佢好多粉丝会买晒，我未有机会买到。」
最新回应