屋企有猫又有狗 江美仪梦想带爱犬去日本浸温泉

屋企有猫又有狗的江美仪连续第二年担任纽西兰天然猫狗粮品牌的代言人，今次两只爱犬Teddy及Tina同样有份，美仪笑言自己「母凭子贵」，多得两位小毛孩带挈搵真银，但讲到尾愿意续约，全因为两只爱犬转食天然粮后健康转好。

美仪说:「最明显系妹妹，食咗一年，大只咗好多，两个毛发亦比以前健康，唔好睇少佢哋个波波头，冇丰厚、柔韧嘅毛发，冇可能剪到，我都好乐意介绍畀身边人，帮到人，又搵到钱，哈哈！」「狗奴」美仪自封购物狂，为拍摄今次广告特别为爱犬准备了多套战衣出镜，「无办法，阿妈锺意shopping，屋企有一个大衣柜放置Teddy同Tina嘅靓衫，其实阿仔唔锺意着衫，今次拍摄过程冇扭计，算畀足面我。」提到爱犬拍摄的表现，美仪说：「其实我前一晚有跟Teddy同Tina讲，第二日要拍广告影相，一定要乖、要醒目、要笑，唔好失礼妈咪，拍摄当日早上，两兄妹好积极，一早起身食早餐，准备出发时，妹妹更吠我，叫我快啲出门口。」

当日美仪两只爱犬相当乖巧，尤其拍摄硬照时，美仪总会在摄影师旁边，手持零食吸引爱犬望镜头，令拍摄进度更加顺利。视爱犬如己出的美仪最大心愿，希望将来有机会带住爱犬一家三口出国旅行。「我觉得人生系由好多快乐嘅回忆所组成，好希望其中一个回忆，系我跟两只狗狗去旅行，因为Teddy同Tina唔会陪到我终老，希望喺佢哋有生之年，能够达成呢个心愿，彼此感受呢份快乐！」

至于最想去边？美仪不失幽默本色：「梗系去瑞士搵飘零燕啦，去埋巴黎铁塔影张相，哈哈！但比较实际其实去日本，因为当地好多酒店都欢迎主人带宠物入住，又可以一齐浸温泉，又会安排宠物膳食，我相信我食少几餐、买少几个手袋、接多几个广告，待疫情过去，到时我应该有能力带Teddy同Tina去日本吧！哈哈！」