【独家】顶着大肚密密出新作 Robynn歌曲送亡母作礼物

叶晴晴（Robynn）自Robynn＆Kendy休团后，在音乐上没有停下脚步，继英文歌《Lost Forever》再推出英文新作《Fifth of May》，6月宣布陀B的她，顶着大肚仍密密出歌，她解释既要安抚一众未能接受休团消息的粉丝，也因新歌正是送给已故母亲的礼物，回覆母亲一封未寄给她的信，对于即将为人母的她在这个时间演绎，别具意义。采访：杜淑霞 摄影：Catcha Studio

新歌《Fifth of May》的灵感来自Robynn病逝的母亲，「妈咪喺我出道嗰年年初离开，之后每年佢生忌5月5号我都会返旧屋，睇吓佢啲遗物怀念吓佢，有年就发现咗一封佢冇寄到畀我嘅信，当时我应该啱啱去咗美国读书，佢话好引以自豪我同家姐都可以考到大学，因为佢冇机会读到大学，觉得自己英文唔叻，呢首歌就好似回信畀佢咁，话佢听我依家过得好好，亦希望将呢首歌送畀世界上所有母亲。」

睇B状况出歌将为人母的Robynn坦言演绎上也受影响，「本来我写歌嘅时候系未有BB，到录音时知道有咗，感受真系会有唔同，歌词都有少少调整，好彩录音时自己忍到冇爆喊，但系好感动。」Robynn自爆陀B头3个月日日揽住个马桶做人，但坚持出歌，除了想送礼物给母亲外，更想答谢粉丝，「点解咁急做歌，系宣布休团之后，好多fans觉得好突然好唔开心，我想话畀佢哋听我唔会放弃音乐，本嚟谂住做完今年啲歌先专心生B，点知BB比预期早咗出现，最初都担心做唔到歌住，因为初头真系不停呕，日日揽住个马桶好辛苦，但系踏入4个月就稳定好多，趁嗰阵时个肚冇咁大就即系去拍埋两首歌嘅MV。」预产期是年底的她，还希望赶时间多推出一首歌，「我好享受依家全部嘢可以自己控制，始终组合会有啲限制，之前自己写咗好多歌，都想快啲畀到大家听，不过要睇吓BB状况先决定到。」