【独家】返新城开咪唔惊得咁多 范振锋叹要搵食冇办法
2020-08-09 22:18 
新冠肺炎严峻，新城电台由歌手施匡翘开始到知讯台执行总监程凯欣出现8人感染群组，在新城开咪的薛家燕（家燕姐）为安全计亦自我隔离14日，更因此缺席TVB音乐节目《流行经典50年》两集录影。上月13日，曾跟7月22日确诊的程凯欣一齐录音做节目《丰味旅程》的范振锋坦言：「我冇本事，要出街搵食，唔惊得咁多！」采访：方骞平
新城爆发感染群组前，范振锋一周至少留喺公司三日，除咗周六同家燕姐及思敏主持《开心大派对》外，仲要为两个节目《三九吾识噏》及《丰味旅程》录音，后者更要同程凯欣拍住上。当电台大消毒解封后，范振锋即重返新城开工，完全冇谂过改做Phone-in。当然防疫用品如搓手液、消毒喷雾及口罩是必备外，仲加码戴埋劳工手套，手上的黑色佛珠就更加显眼。
出街都惊
范振锋否认惊到要戴护身符：「只系普通佛珠，由细戴到大，用嚟保平安啫。」问到返有多个确诊个案嘅新城开工惊唔惊?他坦言返工惊，出街都惊，「中咗好大件事，个人会散晒，入咗个肺就更加麻烦，最好唔出街在家工作，但搵食冇办法，我都想日日留喺屋企唔使做，但要搵食，冇本事有乜计！做好自己责任，小心啲，我都会落街食嘢同买餸。不过以前一周返两至三日电台录三个节目，𠵱家最好一日内搞掂，唔得就在家工作。」
阿范强调曾做过四次检测，全部都系阴性，所以相当安心，他又指程凯欣已出院：「但就唔知几时复工，不过我哋节目仲有存货，所以冇乜问题。」
最新回应