不甘被诬蔑卖假货   林作公开麻烦客个人资料爆粗讉责

林作自2017年放弃执业大律师资格后转行做艺人、补习名师、专栏作家等，真系百足咁多爪。最近他喺IG开二手名牌店，主力放出自己、母亲以及富二代朋友嘅货品，由于他出售嘅货品算新净企理，好多时秒速售罄，网上二手名牌店月赚20万，喺逆市中杀出一条新血路。

 

不过，过程上都有唔少麻烦客。昨日林作就发咗条粗口闹人讯息，除cap咗个客图像，仲公开对方电话及居住屋苑名称，第一次嬲成咁。点解咁火，他喺片中解释：「呢个客人帮衬咗一个手袋及一对耳环，交易完竟然话唔系真品，我亲自覆佢，要求同佢去中环专门店验证，佢又唔够胆，但坚持要求退款，究竟系我诚信有问题，定系佢心理有问题，买嚟玩嘢？大家心知肚明，你唔满意货品唔紧要，可以退款，但诬蔑我林作放售唔系真实货品，我同同事真系无法接受，呢个系对我哋人格一个侮辱，所以截图嚟公开，如果我有更多佢嘅资料都会搵埋出嚟，我更警告其他客户，唔锺意件货品可以同我哋倾退货，但唔可以诬蔑我哋放售假嘢，而我，好锺意同你玩！亦欢迎你哋放马过嚟。」

 

林作接受本报访问时，强调经他查证，忍无可忍要下第一次公开讉责个客：「咁过份，全心嚟人生攻击，呢啲一定要搞，我哋企得住脚。我唔怕因为咁赶客，我哋大把客，使鬼要呢啲咩！我有个有钱仔客，一日买一个，一周买七个袋，送去唔同地址畀女，亦有女士不停系咁买，当然有啲客好麻烦，比如话个袋有原子笔痕，要求大幅度减价，但公开讉责呢个系最过份，喺客人身上反映人性，不过，冇打沉到我，我有助手负责打理，除非特别情况先亲自出手，我反而觉得玩得好开心，好减压，因为系我打沉呢啲人，同人喺网上嗌交系超级减压嘅事，因为大家都会咁做，呢啲先系打成一片嘛，人生好玩，一切都系体验。」