获Do姐点灯大合照企隔离黄庭锋：好想同佢做节目

2020-06-11 11:30

32岁，懂得四种语言嘅黄庭锋（Telford）深受TVB力捧，除咗同谭玉瑛等主持新一辑《香港原味道》外，上周仲拍住女神冯盈盈喺《万众同心公益金》度帮手做菜。稍后演出新剧《飞虎之雷霆极战》。

昨日黄庭锋又有新尝试，今次应邀参与《Do姐有问题》，跟女子组合Super Girls（SG）成员Jessica（蔡明思）、Aka (赵慧珊)、孔德贤玩游戏。Do姐向来对「小鲜肉」都心心眼，而大合照中，庭锋企正Do姐隔离，连好拍档农夫都弹到最开，对此，庭锋笑言唔系受宠：「纯料工作人员安排企位，其实我唔系第一次同Do姐合作，之前曾经接受过佢主持嘅电台节目访问，只系今次玩游戏，Do姐超级公平公正。佢系我其中一个偶像，不论主持及演出都好犀利，相当有感染力，而且仲系与时并进，好努力嘅艺人，值得后辈学习。见到Do姐，我唔会用惊去形容，反而系好想同佢做节目。」

年前庭锋夺得总值过百万嘅台庆压轴大奖，问到今次能否争取到可观现金奖？他就卖个关子，笑说：「我同孔德贤一组，今次拍摄峰回路转，经历咗高山低谷，虽然之前都有做定功课，尤其重温Do姐经典剧集，但现场好考眼明手快，辨声能力，好彩有陆永帮手做逻辑推理，帮到我哋好多，觉得今日好好玩，Do姐同农夫合作无间，令到个气氛超正，其实赢唔赢到现金奖系其次，我反而好享受过程。」