跟许冠杰合作7年被迫分开 黎彼得：佢太太唔想我出现

著名鬼马填词人黎彼得的作品脍炙人口，最近因许冠杰（Sam）的慈善演出再受关注，他受访电台节目《旧日的足迹》，分享与Sam合作的恩怨情「愁」和自己的女人缘。

黎彼得向来我行我素，最开心是16岁为自己改了个新名字，从此改了运：「我小学五年班辍学，喺街边帮阿妈卖报纸，日日坐喺度睇武侠小说。当年入咗一间印度行做工后，啲人知我冇英文名帮我改做Peter，从此我叫黎彼得，唔再叫黎成就，果然条命就冇咁苦！」年轻时的黎彼得锺意听偶像许冠杰的歌，尤其喜欢《天才白痴梦》写人生如梦、世事如棋的道理。「估唔到佢（Sam）喺《年青人周报》见到我写专栏就话要识我，因为当时Sam为《半斤八両》填词，有句『够姜就揸枪走去抢』出现问题，佢发觉一个人写词唔足够，要搵个拍档，可能佢欣赏我古灵精怪嘅脑袋。」

黎彼得忆述：「我帮佢执翻（歌词），加咗『滚水渌猪肠、湿水炮仗点会响』，又几得意，不过佢话嗰首歌就唔可以出我个名，我话冇问题，其他歌佢都有出我个名。点知我哋一合作就好似炸弹咁劲，好轰动！电影《半斤八両》12首歌首首都跑出，内容包括有打麻雀、玩show hand，Sam即时好入世，大家好接受。其实我哋付出好大，晚晚通宵倾偈度桥，我哋嘅相处就好似『乞儿与王子』，佢咁红都当我老友约我去游水、钓鱼……大家好合拍！Sam本来唔烟唔酒，但识咗我之后，开始同我一齐食雪茄饮香槟，享受吓！佢教晓我好多，又介绍我去电视台做编剧，佢系我恩师，我哋擦出火花，不分你我！」
黎彼得又感概二人关系的变化：「后来经过7年合作，因为舆论，我哋开始有唔夹，其实我冇介意（填词人）排名嘅先后，难得佢畀我出我个名，不过其实唔出都得㗎……佢提意不如分开一下，呢次并非一厢情愿（其实大家都有同感），因为（我哋）开始冇话题，冇偈倾，佢太太亦都唔想我出现，因为晚晚同个男人一齐喺屋企通顶，有阵Sam都话，我老婆又投诉今晚又同你一齐……分开咗之后我自觉多咗存在价值，唔再依赖别人，唔需要人哋关照。我封笔几年后，黎小田就叫我出山写《Monica》嘅词。」

问及和Sam合作的7年是否其人生中的高位？黎彼得回应：「有人说我功高过主，讲真功未高过，亦都冇盖过主，Sam好早已经系超级巨星！」再追问二人还有否机会再合作？黎彼得直言没有了：「大家已经系长者，唔好玩啦！过去就系过去，无谓再依恋……分咗手之后已经几十年冇见冇通电话，最近Sam演出我哋都冇再联络……但系我希望佢健健康康，唔好再挂心嗰啲筷子有冇人食过、嗰啲床品系咪有好多尘蟎，继续好似当年我拉佢去油麻地庙街食炒蚬，抱着大无畏精神，食完肚疴，疴完再食！最难忘喺嗰度见到铁丝网上由写信佬写上两句『命里有时终须有，命里无时莫强求』，之后更成为 《浪子心声》嘅歌词红足几十年。我希望佢（Sam）继续做个开心人，因为我多谢佢upgrade咗我，佢系我恩师！」

黎彼得虽然在幕前经常饰演一些猥琐的小人物，但自言好有女人缘，皆因他是绝缘体，例如他可以拖住梅艳芳的手，听阿梅谈得不到的爱情，被男人辜负的故事；摸著佘诗曼的手拍《洗冤录》；拍摄《笑八仙》曾在关之琳的心口写毛笔字。「靓女放心就系知道我冇歪念，我与有荣焉，又例如拍《富贵吉祥》导演要我性骚扰张曼玉，佢话唔使搵其他女士替佢嘅手，佢话系演员道德，其实佢哋知我嘅所作所为就系正人君子。仲有当年翁美玲事件，吴君如不断被追访，佢为咗避记者，就嚟我屋企瞓咗成个礼拜，因为大家都住北角，佢又知我系绝缘体，我真系有心无力，亦都唔会情不自禁。」