【头条独家】「盲侠」飞车公路左摇右摆铲上壆 王浩信克服脑震荡阴影
2020-04-16 21:00 
3年前凭《踩过界》初尝视帝滋味的王浩信，演「文申侠」上晒身，日前「盲侠」为《踩过界II》拍一场飞车追逐戏时刻意揸车揸到左摇右摆，最后仲铲埋上壆，非常惊险。拍《致命复活》飞车戏时曾经受伤的王浩信强调呢场仅得两分钟嘅追车戏其实几有难度，「因为要扮听住导航，所以要尽量用侧面视野嚟揸车，有啲危险性。」采访：方骞平 摄影：李维隆
最近再拍林志华《踩过界II》的王浩信搏到尽，除咗地狱式连踩19日法庭戏外，仲要接受多个挑战。日前他于西贡拍摄一场追车戏，剧情讲到他为咗心急查案，就算盲都要揸车追住前面黄祥兴座驾，为表达「盲住揸车」的唔安全，所以王浩信要刻意揸到好唔稳阵，喺路中心左摇右摆，甚至铲埋上石壆急煞停，他带点紧张说：「虽然我唔系真失明，但呢场戏对我嚟讲系好大考验，要演到靠对耳，听住导航去揸车，最难系用侧面视野，唔好望住正面嚟揸车，所以演出时个头尽量唔好郁咁多，要集中精神，边畀戏边揸车，同平时驾驶分别会大啲，会有少少危险性，拍前要同特技组人员度好晒位，有工作人员会匿喺后座扮导航同我互动，好彩外景场地比较静，唔会影响到人，都叫顺利完成啦，呢次真系好特别嘅驾驶经验。」
拍剧受伤有创伤后遗
王浩信重提4年前拍剧集《致命复活》时发生交通意外受伤的阴影：「当时坐喺司机旁边嘅乘客位，个头撞咗落挡风玻璃，之后头骨肿咗，送院后因为脑震荡断片，瘀血由额头散落只眼度，期间不停睇医生，要年几先康复，嗰段时间坐乘客位都有啲创伤后遗症，谂返起都会惊，就算之后拍戏都要小心啲。今次都算系克服咗，其实我又唔系叫搏晒命嘅，但凡入到镜会尽量亲身上阵，由于今次系做司机反而唔会太担心，加上有特技组傍住应该OK。」
咀戏借位床戏靠意识
喺外景场地现身嘅张曦雯(Kelly) 话其实两人雨中共舞戏都有挑战性：「因为疫情关系，咀戏全部要借位拍，床戏只靠意识，即系只有除衫挞落床嘅动作，咁样大家最安全，我信唔过自己又信唔过人哋，浩信又有小朋友，安全第一罗。」亲热戏Cut得就Cut，但有场分几钟嘅雨中共舞戏唔Cut得，「呢场戏有最多身体接触，亦拍得好浪漫，我要踢腿，畀王浩信抱住转圈。」王浩信说：「事前我哋搵舞蹈老师排咗两个半钟头，相对Kelly，我比较容易啲，因为我系盲嘅，由Kelly做主导，带住我嚟跳。其实我哋都有两场床戏，不过我承接返part 1话我系唔得嘅，就算瞓咗落床唔会有任何身体接触。」
练好眼神同红姐合作
另外，王浩信又表示要开始练返眼神，因为下月要跟惠英红合拍新剧，要做定准备：「记得当日拍完《踩过界》紧接拍《溏心风暴3》，工作人员问我：『点解你成日好似瞓唔醒咁嘅？』呢个系好好提示，都要留意返。剧中我会做红姐个仔，但唔系正常母子关系，好期待同好演员合作。」
最新回应