【头条独家】上位「女配」 扮「啤酒妹」谷胸冧客 赵希洛疫市晒三寸事业线

新冠肺炎疫情严峻，唔戴口罩喺闹市拍剧相当高危，不过，年头夺得台庆「女配」嘅赵希洛及「飞跃进步」张振朗唔谂咁多，拍林志华新剧《踩过界II》时就瞓身回报公司知遇之恩。自爆有洁癖，疫情下戴晒韩式防飞沬帽加口罩出街的赵希洛谷胸露髀扮「啤酒妹」冧客，性感造型非常抢眼，张振朗更大赞她为艺术而牺牲。采访：方骞平 摄影：张咏森


当晚赵希洛及张振朗喺深水埗医局街及海坛街交界一个大排档拍夜戏，附近有好多格局简陋嘅色情发廊，品流复杂，而且两人取景位置又贴近大厦楼梯口，住客出出入入，但无阻两人演戏非常专业。当晚落住微雨，楼上冷气机滴晒水，甚至滴落张振朗嘅道具餸上，但他喺镜头前照样大啖大啖食，完全唔怕。见他不时用搓手液洗手亦非常卫生。

大赞张振朗乖仔

当日拍摄张振朗为咗查案扮醉接近「啤酒妹」赵希洛攞料，女方仲拉低外套晒3寸事业线落力冧客，更陪埋男方「吹喇叭」畅饮，原来拉开外套拉鍊系导演临时要求，觉得剧情咁样比较合情合理，赵希洛喺色情发廊附近「坦荡荡」虽然系有啲尴尬，但都好pro咁答应照做，拍完嗱嗱声拉返好。张振朗也笑说：「佢为艺术而牺牲！」被问到赵希洛身材正还是女友杨偲泳较索？张振朗即紧张摇头：「我冇睇过(赵希洛)喎！但就算女友唔喺度都会答女友较好，呢个问题唔使问。」赵希洛就猛赞张振朗：「我相信佢冇𥄫过，佢好乖㗎。」


闹市谷胸几尴尬

问到要喺大排档谷胸露髀做啤酒妹会否尴尬？赵希洛坦承有啲唔惯。张振朗大赞她够专业：「见佢埋位就上咗身，入晒角色。」赵希洛提醒记者：「不如你留意吓我身形吖，因为知道要着比较少布嘅啤酒妹制服，为咗效果好啲，我食少咗嘢，而且拍前几日戒盐，少咗水肿，今日撞到坤哥(吴业坤)都话我块面尖咗。」语毕她追问张振朗：「我合唔合格呀？」张振朗即回话：「非常之好啦！」两人又否认获奖有鼓励，拍剧会更进取，赵希洛说：「我向来会跟剧情需要，套套剧叫我都会跟足剧情去做，又冇话唔相信个剧本，睇我以前作品同𠵱家冇分别。」张振朗透露赵希洛在此剧除咗性感，最特别系玩口音，因为她扮演越南妹。

食维他命C防疫

两人均表示喺疫情下要头贴头演戏都冇得惊：「剧组好好嘅，个个都戴晒口罩，戴足全日唔除，喺我哋冇得戴口罩时，佢哋都负返佢哋嘅责任，咁都安全好多嘅。」赵希洛说：「我见冷气机滴水滴落碟炒菜度，佢仲大啖大啖食，我叫佢唔好食，会肠胃炎㗎！」张振朗却蒙查查：「系咩？我都唔知，因为场戏叫我食啲嘢嘛，呢啲好难避免。」另两人亦Keep住食维他命C增强免疫力，唔想病咗冧厂影响剧组进度。