发长文给失业人士提供选择 Bob：自己人生自己救

林盛斌（Bob）不止爱夸张搞笑，在今个疫情下，他经常发放正能量。今日他就为失业人士提供3个选择：搵工、开公司做生意、进修搵新出路，内容很有建设性很正经，很有心打很长的一篇文，所以网民纷纷给他赞。
Bob说：「呢三个选择，试吓，做吓，都可能会有转机，但系，乜都唔试，乜都唔做，就肯定收皮！」、「我估我呢一刻面对紧嘅问题唔会比你少，唔好再嘥时间、嘥心机去埋怨呢样嗰样，亦唔好期望个社会有咩政策措施会帮到你。」、「自己条路，自己掌控；自己嘅人生，自己救！」、「疫情，逆境，总会过去，只系需要d（啲）时间，记住，个市停，个人GDP绝对唔可以停。」、「各位，坚强，努力，加油！」

全文如下：

睇完一个新闻节目讲到香港嘅经济情况，
报导最近所有旺区嘅铺头接近九成冇开，
中环、湾仔、铜锣湾、尖沙咀、旺角，
全部黑妈妈，条条街都系小猫三四只甚至冇人，
未来呢段时间，我相信，真系会有好多人会失业。

如果你最近失去咗工作，其实你有三个选择：

1）马上去搵工
我知可能而家会比较困难去搵份工，但系唔紧要，
难啫，唔代表冇，仍然有公司系需要发掘人材，
不过可能你要做一d唔系你之前做开嘅嘢，
又或者可能要做一份冇之前咁好收入嘅工作，
冇所谓啦，马死落地行，做住先啦朋友，
可能因为咁而发现到自己一直冇为意嘅才能，
之后越做越好，迟d搵得仲多呢，
点都好过日日坐喺屋企度玩手指吖！

2）开公司自己做生意
我知你会话：吓？有X钱呀？
其实做生意唔一定要用你好多钱，
只要你有一个唔系人人都有嘅专长同技术，
而个市场系有需要呢种服务嘅就可以，
例如你系一个专业嘅平面设计师，
你去公司注册处俾两三千蚊开间公司，
跟住开一个社交平台例如 Facebook IG 嗰d，
然后将自己之前设计过嘅所有作品放上去，
再用你部电话拍片去话俾人知点解你会咁设计，
个logo想表达乜嘢，点解个构图系咁等等，
又或者教授一d基本嘅设计技巧同技术，
用尽一切方法去为你嘅follow带嚟价值，
最后叫大家有需要搵人做设计可以PM你。
有需求，有供应，呢个，已经系一个生意。

3）将你嘅兴趣进修，然后再搵出路
每个人都会有令自己提起劲嘅兴趣，
假设你最钟意打篮球，以前又校队又盛咁，
一直都有打，仲要系打得唔错嗰班，
你可以衬呢个时候去操fit自己同进修一下，
上网又好睇书又好，去学吓点做一个篮球教练，
然后将你嘅履历寄去全港所有中小学社区中心嗰d，
话俾佢哋知你虽然冇乜经验但系好有heart，
好有火，兼收费非常贴地（呢个好重要），
我相信衰极都总有三两间会搵你试吓呀嘛！

呢三个选择，试吓，做吓，都可能会有转机，
但系，乜都唔试，乜都唔做，就肯定收皮！

你，会点拣？

我估我呢一刻面对紧嘅问题唔会比你少，
唔好再嘥时间、嘥心机去埋怨呢样嗰样，
亦唔好期望个社会有咩政策措施会帮到你。

自己条路，自己掌控；
自己嘅人生，自己救！

疫情，逆境，总会过去，只系需要d时间，
记住，个市停，个人 GDP 绝对唔可以停。

各位，坚强，努力，加油！