【头条独家】霉足四年终于有运行 冯允谦好想写歌畀Sammi

两年前转投东亚唱片嘅冯允谦（Jay）双喜临门，除推出新碟《Detour》外，年初仲勇夺十大中文金曲的「CASH最佳创作歌手奬」。霉咗近4年，Jay对于绝地反弹觉得好梦幻：「呢只专辑足足等咗3年零8个月，等到有啲心灰意冷，好彩雨过天青，𠵱家仲得到Sammi鼓励，信心慢慢返嚟，心情劲兴奋。」采访：方骞平 发型：Tim Chan@HAiR 化妆：Maggie Lee 服装：ithk 场地：重庆刘一手火锅

新碟《Detour》主题为「旅程」，Jay之前曾经历过一段事业低潮期，零工作兼零收入，个人变得好颓，冇晒人生目标：「当时觉得唔知仲会唔会有唱片公司签我呢？日日唔知为乜咁做创作同健身keep住状态，庆幸喺低潮时学会编曲，去旅行散心时又创作咗40几首歌，其中5首收录喺专辑入面，总算冇白费心机。」Jay坦言见到张实体碟好感动，「尤其有陈咏谦做音乐总监，王菀之有份作曲，仲有好好嘅宣传团队，同埋好似屋企人咁锡我嘅经理人林珊珊及老板林建岳，每首歌都做得好好。」

赞好Sammi
之前Jay出席公司饭局，同场有老板及郑秀文等，提到Sammi，Jay赞不绝口，「Sammi好关心新一辈歌手，因为我有啲歌唔大路，于是问吓佢意见，佢叫我做返自已version，自然会吸纳返知音。难得有机会同Sammi倾偈，感觉好似发紧梦咁，尤其哥哥系佢Fans。我梗系有送碟畀佢啦，希望佢会听，如果将来有机会度身订造首好歌畀佢更good，好想写只快版情歌畀佢，因为佢跳舞好好睇。」