【头条独家】杨怡就生 拍剧变紧张大师 罗仲谦为保老婆随时租酒店住

上月中，40岁嘅杨怡喺社交网贴出超声波照公布怀孕，预产为今年5月。老婆粗身大细，喺疫情肆虐下开工拍剧嘅准老窦罗仲谦坦承压力好大，惊青到变咗紧张大师，要女助手带齐抗疫装备、私家碗筷、暖水壶「侍候」，谦谦自爆亦有紧急方案，有乜头晕身㷫会分房瞓，甚至另租酒店，杨怡仲有两个月生得，当然唔可以掉以轻心。采访：方骞平 摄影：李维隆

杨怡同罗仲谦恨咗4年终于传喜讯，亦系后者家中第一个孙辈出生，BB集万千宠爱，两家人都相当紧张，但为咗搵奶粉钱，谦谦都要喺疫情下拍TVB新剧《陀枪师姐2020》。上周六晚，谦谦和邓佩仪等去咗土瓜湾某餐厅拍外景，十几个剧组人员焗喺一间得几百尺，密不透风嘅冰室入面，演员坐喺相距唔够一米距离下讲对白，剧情仲要讲邓佩仪帮他按肩颈，又喂他食鱼旦，用手推他额头，有咁多身体接触，好大播毒风险喎！

开工压力好大

当晚，罗仲谦有女助手「侍候」，随时奉上酒精搓手液、消毒湿纸巾及口罩等，仲不时递上暖水壶，等谦谦湿润吓喉咙。谦谦解释：「就嚟做爸爸实惊㗎，因为𠵱家成日出嚟开工，拍剧时唔可以戴口罩，所以每次返屋企入门口前都自我消毒，一入屋就除衫冲凉同洗衫，同埋食多啲保健嘢，增强抵抗力，仲自备埋私家碗筷，远离大队开餐，宁可食剧组饭盒都好过喺餐厅食饭。」他更自爆戒埋冻饮，怕会刺激到喉咙唔舒服，饮暖水就可以保持湿润，不过，却被记者发现他有偷饮冻嘢，他说：「就算只系伤风感冒都好惊，有阵时瞓醒觉喉咙乾乾哋，心谂：『大镬喇！』即时饮返啲暖水先，好彩只系自己吓自己，真系会惊，好大压力。」

口快泄密生女

变紧张大师的谦谦补充，「自己一个人就话啫，𠵱家唔得嘛，最惊系返唔到屋企，所以我同阿怡倾埋应变措施，如果有几声咳会分房瞓，亦谂定会喺将军澳租酒店住，我𠵱家连做健身都戴住口罩，始终要同屋企人负责任，做嘢同屋企要取得平衡，𠵱家一定系屋企行先，好彩呢套剧冇咀戏，阿怡反而担心我拍打斗戏，有啲场口要打到瞓晒落地，今时唔同往日，拍唔到就搵替身。」谦谦仲话开始做紧胎教，会用温柔语气同BB倾偈：「我会问吓BB：『今日食咗乜呀？』同佢讲吓《三只小猪》故事，仲听吓儿歌。佢系我爸爸嗰边第一个孙辈，BB会由长辈改名。」罗仲谦作为家中长男，问到BB系咪长子嫡孙？他口快快泄密：「又唔系，即系点讲呢？系第一个孙辈…(唔系长子嫡孙，咁即系孙女？)我谂紧我系咪长子啫，因为我屋企多人。」原本谦谦想亲自剪脐带，但受疫情影响，暂时冇得进入产房。

老婆骨痛扭计

讲到杨怡状况，谦谦表示太太陀B过程都OK，冇乜唔舒服，只系变得好大食。「夜晚返到屋企仲要煮宵夜佢食，费事佢行嚟行去。因为大肚婆要打侧瞓，佢成日瞓得唔太好，会腰酸骨痛，唯有帮佢按颈、按脚松骨。」对于同邓佩仪近距离拍剧，谦谦话讲个信字：「我相信佢，佢相信我，做好本份罗。而且开工前先探热量体温，公司安全意识都提高咗。」邓佩仪附和：「公司啲道具用漂白水抹过，连碗鱼蛋粉都经过高温煮熟，我要令拍挡安心，保持个人卫生。」