【头条独家】劫后馀生冇晒安全感 黎芷珊狂抹厕板「保命」

54岁的黎芷珊刚过了一个难忘生日，一切由1月尾踏上「疫轮」钻石公主号而起。她苦笑说：「死过翻生后仲要被歧视，劫后馀生仲郁出一个好冇安全感嘅心理病，但有呢啲擦身而过嘅经历都几新鲜，更珍惜身边嘅一切！」采访：方骞平 摄影：谭壹致 场地：HAKU Curated By Hideaki Matsuo

经过一个月自我隔离，虽然黎芷珊喺朋友力说下「出关」庆生，但冇咗以前嗰份安全感，坚持去埋呢几场party又要再收埋自己：「可能得自己一个人住，经过呢件事变得好冇安全感，隔离期间日日有留意疫情资讯，觉得唔出街最安全，好担心出面环境。就算独留家中都好担忧，盖上厕板冲厕后，每次使用洗手间前都要再用1:99漂白水再抹一次厕板。」

喺屋企闷到癫咗
清洁做到足嘅芷珊仍然非常担心，「有时冇嘢做会谂埋一边，同埋应该喺睇医生前同屋企人讲低银行户口、保险、提款咭密码等，万一我有事，佢哋攞唔到我啲钱咪死，仲要交条门匙畀前度张达伦嚟照顾两只爱猫，隔离期间我闷到日日同猫倾偈，讲吓『早晨呀！』好低能无聊㗎，冇人同我讲嘢嘛，都要讲吓嘢㗎，以前我唔锺意讲电话，嗰段时间朋友传讯息畀我，我反而会要求通电话，想郁吓个口，闷到癫咗，好似有心理病咁，不过，又唔太想出街，觉得冇必要，去完要由头洗到落尾好烦，出面好唔安全，唔想出去，所以食埋呢几餐生日饭，都要留守屋企先。」

问到生日愿望系咪搵个男友照顾？芷珊姐姐即说：「都系喎，但竟然唔记得许呢个愿，生日愿望反而好宏观，真系想疫情快过，𠵱家生意、工作受影响，心情又唔好，喺屋企都担心，眼见钻石公主号有确诊者死亡个案都好难过，觉得世事无常，会好好珍惜身边嘅一切！」