【头条独家】南韩返港冇自我隔离 白云日日拉筋抗疫

港府针对新型冠状病毒肺炎疫情扩散，宣布对韩国「封关」，近年转当YouTuber嘅前艺人白云(Snowy)上月29日由南韩回港至今日未过14日「安全期」，但她依旧招呼朋友到屋企，甚至每晚在寓所附近放狗，她自称冇头晕身㷫，身体好健康，全靠日日好落力做运动抗疫喎。采访：方骞平

白云返港后，头四天都好乖咁留喺屋企「抗疫」，留家做乜好？当然系做运动。换上粉蓝色Bra Top，露出「深坑」事业线的白云，在窗边望住无敌开扬靓景做运动。她说：「其实主要系拉筋，个人会精神啲！」至今白云返港未过14天「安全期」，问到会否同家族坐拥逾二亿物业嘅建筑师老公江俊霖(前香港先生)分房瞓？她即避谈，话唔想多提老公。

唔怕系隐型患者
目前白云每日要填写「健康检查记录表」，包括早晚量度两次体温，留意身体状况等，如要出外务必配戴口罩。虽然南韩肺炎疫情已经喺社区爆发，但白云坦言回港后冇自我隔离，唔怕成为隐型患者周围播毒：「我都冇病冇痛，而且只系去过明洞、弘大及江原道滑雪场，都唔系好多人，加上连食饭都系外卖返酒店，感染机会唔太大。」白云表示返港后好忙，因为之前做fashion mask代购要联络返买家，但晚晚11点后都有去放狗，她强调好夜条街冇乜人，亦有戴两层口罩出外，好安全，其间亦有朋友嚟佢屋企探访。

代购口罩赚外快
讲返韩国之行，她无奈表示赚钱工作受疫情影响被取消：「但我唔甘心无功而回，所以决定留低睇吓有乜可做，除咗上咗雪山学snowboard外，亦有去江南、南山塔、新沙洞等拍节目《云游四海》，用手机拍成『闯韩日记』，记录一个人去旅行嘅点滴。当时疫情未喺韩国大爆发，首尔间间药房都仲有好多口罩，只系略有加价。」做开代购生意的白云趁今次行程，买入100个fashion mask喺网上平台出售，但却被质疑口罩唔乎合抗病毒规格，被指货不对办。白云解释发售嘅只系时尚口罩：「呢啲fashion mask系戴喺医用口罩外面，衬衫一流，口罩唔会有空罅，仲好似胸围咁可以日日洗，而且唔系布，富高弹性，柔软透气，唔会影响呼吸，所以已火速售罄，既然此行冇工作零收入，我就用呢门口罩生意嚟帮补交学费。」