【头条独家】 相处舒服唔使迁就 郑俊弘冧赞何雁诗零缺点
2020-03-03 21:12 
刚在元旦公布跟何雁诗婚讯的郑俊弘（Fred），近排在新剧《法证先锋IV》演科学鉴证主任「湛霆」，虽然提到拍摄时好多专有名词要背，又要同时做埋实验，好鬼难应付，但准人夫心情超好，全程冧滋滋，提到未婚妻更有赞冇弹，仲冧爆公开认定对方的原因，就是大家相处劲舒服，完全唔使改变自己去迁就对方，总之未来老婆就零缺点啦！撰文：杜淑霞 摄影：谭壹致 服装：TOPSHOP
早在《法证》第一、二辑Fred已有份参与，不过故事跟今辑完全不同，原来同样饰演法证人员的他，依然未适应要背大量专有名词对白，「今次要英文讲完再用广东话解释，啲英文难读又好长一个字，都要上网睇吓啲发音。」Fred话，有时仲要同时兼顾做实验，更加困难，「做化验啲手势要好纯熟，唔系又冇说服力，相比下拍生活戏就变得超级轻松。」
怕老婆讲一世
讲到做准人夫心情，Fred坦承Keep住开心，现在忙于畀意见未来老婆何雁诗去筹备婚礼，「畀唔够意见，佢（未来老婆）会觉得我唔用心㗎！我啲朋友畀意见我，就算冇意见都要扮有意见，要好似有自己idea，虽然最终都系佢拣，但要畀佢觉得你紧张，唔系会畀佢讲一世㗎！」不过，他亦不忘补镬，自爆认定何雁诗做另一半，只因女方近乎完美，「同佢相处最舒服，佢好乐观，好有耐性，大家相处好自然，唔使谂啲乜嘢或者改变任何嘢去讨好佢，大家有个尊重，好平衡，冇话边个食住边个，我哋系最好嘅朋友，唔系情侣咁简单，咩都可以分享。」谈到这段情之前不被睇好，现在终开花结果，Fred好感触话：「反而令我哋关系仲深，以前经历过呢啲𠵱家去到呢步，大家好珍惜对方，我哋好少事都好开心，一齐坐睇吓电视已经好满足。」
最新回应