新节目讲错嘢遭网民批评　伍咏薇fb开Live接受批评

伍咏薇（伍姑娘）主持的ViuTV新节目《埋嚟睇﹒埋嚟玩》昨晚首播，早前她已预告节目内会派钱，每日派4千，一星期5集就合共派两万元，而游戏玩法是主持公布问题后，观众只要透过节目提供的Whatsapp号码提交答案，最具创意的4位参赛者，便可瓜分4千玩奖金。至于第一集的问题是：「最想任食啲咩？」未料，一条咁普通嘅问题于节目出街后，居然引来极大回响，原因并非观众的答案几咁有创意，而是伍姑娘的反应和对答，令观众及身边4位年轻主持好「惊」喜！

事缘一名男观众称最想任食「阿嫲煮嘅南乳炆鹅」，伍姑娘于是问点解啦，对方就回答：「因为已经冇机会再食啦。」语毕一众年轻主持一脸严肃，岂料伍姑娘继续吴若希上身追问：「点解呀？」男观众表示嫲嫲已经「上咗天堂」的同时，伍姑娘亦细细声地口噏噏问：「Ham（指『香（死）』）咗？」年轻主持们听到即面露惋惜，不过大情大性的伍姑娘却谓：「咁你可以学整㗎嘛！你唔识我哋教你整好冇？」男观众惟有客气话好。对此，不少网民认为伍姑娘的对答不太恰当，有人斥：「好离谱罗……唔使问都明白啦吓话……」，亦有人建议：「其实答『好理解你感受』就够。」

事后，伍姑娘都好愿意接受大家的批评，刚才更于社交网上载一段短片，她说：「多谢大家昨晚睇《埋嚟睇﹒埋嚟玩》，好多谢你哋，收到好多朋友嘅意见，综合意见后，我觉得开心嘅咁多人睇。」并预告今日6点在Facebook开直播，与网民互动分享，仲叫大家畀多啲意见，《埋嚟睇﹒埋嚟玩》的团队会继续努力，多多指教咁话。