【头条独家】被胞妹取笑身形似妈咪余香凝发奋减脂

2020-03-02 23:00

虽然受新冠肺炎疫情打乱晒手头工作，但余香凝(Jennifer)话抗疫期间并冇白过，因为她如常去电台宣传新歌《无得比》，其馀时间就留喺屋企温书，还会做运动Keep Fit，为延期嘅处女演唱会做准备。日前她换上小背心，同妹妹余洁滢齐做运动，强身健体：「虽然改咗期暂时未知公司新安排，点都好啦，但机会系留畀有准备嘅人！」采访：方骞平场地：V02 Fitness & Martial Arts @礼顿道

为保持最佳状态开Show，日前Jennifer同妹妹去做运动，玩吓健身波收大腿、腰围及手臂，Jennifer体能较好，而且较有恒心及耐力，妹妹就有啲姐手姐脚，Jennifer说：「事关好多人话我肥，有日我喺客厅换衫，妹妹瞓醒打开门见到我身形，佢以为我系妈咪，好hurt呀！妈咪都老老实实话我『做艺人算好肥』。冇计，我体质好易肥，唯有赖妈咪当年陀我陀得唔稳，要打十枝荷尔蒙针，所以搞到我𠵱家大大只，唯一系身材比妹妹丰满，不过，我宁愿瘦。」