【头条独家】被麦美恩爆洗衫密咗 冯盈盈：疫情下更珍惜妈妈
2020-02-28 20:25 
TVB因应新冠肺炎刚播完的特备节目《学是疫学非》令「是非精」麦美恩、冯盈盈、戴祖仪、刘颖镟及何依婷汲取唔少抗疫知识。麦美恩更爆料指喺疫情下，冯盈盈𠵱家洗衫都洗密咗。盈盈就带点唔好意思话，𠵱家会拎衫返屋企畀阿妈洗，因为住紧嗰度都冇洗衣机。当被问到内衣裤等贴身物品系咪交托阿妈代劳清洗时？她哑口无言，一脸尴尬道：「自己洗罗…咁唔系点啫…」搞到现场「是非精」丧笑，祖仪忍唔住取笑她：「好担心你嫁唔出呀！」好搞笑。采访：方骞平
藉着今次节目，各人都话得益良多，刘颖镟学会自制酒精搓手液，何依婷就话，检测下原来用酒精搓手液比梘液成效更好；麦美恩就呼吁唔好盲抢物资，唔系个个啱戴N95口罩，尤其呼吸唔正常唔好戴，平常人只要戴住外科口罩就OK；戴祖仪就提醒大家唔好用酒精喷口罩嚟杀菌，咁样反而会破坏口罩结构。麦美恩最开心《学是学非》终可以成为十点半嘅节目，「是非精」人强马壮，都想合作拍剧，笑言最好搵埋韩星元彬做男主角，戴祖仪就话：「听闻古天乐同TVB仲有合约，我想拣古天乐呀。」盈盈拍手附和：「我哋同古天乐拍完嗰套剧，仲有电影拍𠻹呀！」
另外，麦美恩指盈盈以前隔几日先洗一次衫，好污糟，𠵱家洗衫都洗密咗。盈盈即辩解：「如果冬天有底衫，冷衫着三次先洗有乜问题？着一次就拎去洗，件衫好快缩水，𠵱家惊自己洗得唔乾净，所以呢方面交畀有经验嘅妈妈洗，但绝对冇当阿妈系工人。(咁内衣裤呢？) 系…自己洗…我哋讲下个话题喇…不嬲都知妈妈好嘅，𠵱个疫情更珍惜妈妈。」
最新回应