【头条追踪】带两个女陪老婆返乡过年何猷启返港「无罩」与友聚会

2020-02-12 23:00

新冠肺炎(前称武汉肺炎)疫情日渐加剧，食物及卫生局长陈肇始仲话未来两星期是抗疫的关键期，强烈劝吁戏院及卡拉OK等娱乐场所暂停营业，亦避免打麻雀及聚会，以减低病毒人传人的风险。本周日下午，赌王何鸿燊三太陈婉珍的儿子何猷启同老婆GiGi及一班朋友去浅水湾食Tea，食嘢梗系唔戴口罩，但何生食完嘢都冇戴返，翻查资料，佢同老婆及两个女一家四口返过内地过年，佢话唔系去武汉，去边唔讲，去咗几多日唔讲，有无自我隔离唔知，咦，咁样呀。采访:张咏森、谭壹致

赌王何鸿燊家族去年好多喜事，子女相继结婚生仔，开枝散叶。包括去年2月，三房儿子何猷启自爆已跟女友在外国秘婚，其后再爆出已为人父，并于4月承认已有一个11月大的囡囡Tittania；10月再诞下二女Tylia，两年抱两，生产力相当强。

两公婆疑似有拗撬
过年前，何猷启曾到医院探望赌王，当时佢表示新年会陪太太返内地拜年，仲会带埋小朋友去，对于武汉爆发肺炎，佢就话：「我哋唔系去嗰区。」问到几时出发，佢话唔讲喇。本周日下昼四点半，见到何生同老婆及朋友一行八人去咗浅水湾食意大利菜，众人食得好开心，无口罩情况下有讲有笑，贴住老婆坐嘅何生发言量都几多，食咗个几钟埋单，众人步行往露天停车场，由餐厅去停车场十几分钟，同老婆行到离行离迾嘅何生无戴口罩，话晒内地返嚟喎。