【头条独家】医护囝囝食特敏福入Dirty team 麦洁文庆幸儿子无拍拖

新冠肺炎疫情持续肆虐本港，不断有新增确诊个案，加上防疫装备短缺，对前线医护人员来说更添压力，麦洁文（Kitman）跟江华的26岁儿子陈耀淙（Bryan）系大埔那打素医院男护，因自愿加入「Dirty team（抗疫队伍）」备受网民赞赏，更大赞Kitman两公婆识教仔。对此，Kitman谦称：「大家言重喇，不过，呢排阿囝为咗抗疫情真系好忙，仲要食特敏福开工。」Kitman更指生得高大威猛嘅Bryan因为好忙，加上出入高危地方，单身更好！采访：方骞平

有个做前线医护嘅囝囝，的确有苦自己知，Kitman无奈说：「𠵱家我哋两公婆都冇乜机会见到个仔，因为佢经常早出晚归，见到面只系一声hi一声bye，而且仲要距离得好远，大概客厅一头一尾咁上下。佢每次喺房出嚟，会系whatsapp家庭群组度通知大家：『我出嚟啦！返工喇！我会行去边度呀！大家都要回避吓佢，佢仲要叮嘱工人唔好入去佢间房度清洁，怕工人唔小心会染病，我哋仲要分段食饭。有时我会忍唔住，敲佢房入去叫吓佢，佢就好忟憎喺whatsapp话我：『配合吓好唔好？真系好危险喎，我唔想你哋都有事！』咁又喺嘅，佢要食特敏福嚟开工就知工作环境有几高危啦！」

屋企用视像沟通

囝囝要冒感染风险打工，Kitman表示明白亦理解，「冇计㗎，最重要做到佢想做嘅嘢啫。佢只系个护士仔，唔使发挥带头作用，佢自愿入队，举手话『既然咁多人惊入去，咁我入去先啦。』呢方面佢心智好成熟，做到佢想做嘅嘢都戥佢开心，一日做医护都预咗啦，就算唔系呢个病都有好多传染病，担心都唔系𠵱家，亦无需要太担心同心痛。」Kitman唯有苦中作乐：「我哋两公婆同囡囡陈蔷天停学同停工，留喺屋企冇乜嘢做，有时三个坐晒喺客厅会同留喺房入面嘅Bryan视像，呢个做法唯一觉得几得意嘅，都好特别罗！喺一片欢乐声中进行，大家哈哈笑，开心吓就算。

阿囝提示勿捽眼
Kitman透露囝囝好少跟她讲公事，同爸爸倾得比较多，因为江华𠵱家冇嘢做，见囝囝追更咁辛苦，会变身uber司机送个仔返工，乘机亲子：「其实我唔系紧张大师，但阿囝不时提示我哋，话去人多聚集嘅地方，就算带住口罩，但仍然用手去捽眼鼻呢啲举动系最危险，要勤洗手，所以我唔会逗留街市咁耐，而且拣人少时间先去。阿囝做医护会好审慎，我咪唯有配合吓佢罗。(女友有冇担心佢？)」阿囝冇女友，佢𠵱家做咁高危嘅嘢，冇女友较好。」

儿子带出正能量

对于Bryan行为获网民激赞，教出一个乖仔的麦洁文说：「唔系骄傲呢回事啦，系医护人员应尽责任，大家言重喇！其实咁都好嘅，带正能量畀人，希望啲人积极啲抗疫。」目前麦洁文停晒工作配合全城抗疫行动：「教室经已停学半个月，唔想学生有任何传染机会，相信每个香港人都要配合，喺呢个时候仲聚集好唔啱。喺广州求学嘅天天本身放紧年假，佢好早就返咗嚟，但因为疫情影响广州都要延长学校假期至另行通知，最快2月尾3月初。」