【头条独家】高危时期「小猪比」突烧至39度 陈展鹏漏夜带女睇急症

武汉肺炎疫情严峻，令唔少父母都非常担心，陈展鹏囡囡「小猪比」陈诺瑶10个月以嚟冇病冇痛，喺大年初二晚突然发烧至39度，搞到展鹏夫妇不知所措，决定漏夜带囡囡去高危嘅医院求医，好彩只系感冒，服药后翌日就退烧，唔少朋友都大赞呢位新手爸爸反应快，够机警！因应疫情，TVB新剧《逆天奇案》暂时停工，展鹏就利用额外假期发放父爱，自爆亲子关系更有所提升！采访：方骞平

对于「小猪比」第一次发烧兼且有点肚屙，陈展鹏都一额汗，他忆述说：「之前开工太忙，好多亲友投诉成年都未见过『小猪比』，我哋见初二都唔算太冻，小猪比状态又OK，所以带咗佢去拜年，见吓亲友兼逗利是，点知即中招，估唔到个女喺猪年都要病一病(2月4日立春才算属鼠年) ，其实佢经已好犀利，出牙仔都冇发过烧，可能转天气。」新任爸爸表示病毒好犀利，小朋友一唔舒服即刻发烧，「其实我哋都唔想做怪兽家长，真系好矛盾，但疫情加流感咁犀利，最怕喺呢个敏感时间出入医院，好彩医生够经验。原来做怪兽家长都要识做，要因应天气，唔少朋友都赞我够机警，话如果再拖迟两日先去求医就会更麻烦。」

赞小猪比够硬净

展鹏又大赞爱女好掂：「佢性格好硬净，唔舒服唔会丧喊扭计，反而系咁拍打自己个头。𠵱家我哋尽量避开去人多挤逼嘅地方，唔系惊，系公民责任，既然Feel到情况恶劣，少啲出街相对少咗被感染机会，咁样疫情就会容易处理，为人为己，出街就要做晒全套防护措施。」展鹏又指因为唔使开工，多咗时间享受亲子乐。「之前只系喺圣诞节放咗半日假，同『小猪比』去完打针就过咗去添马舰嘅游乐场，喺摩天轮下同『小猪比』飞吓，观摩吓爸爸小时候最恨玩嘅旋转木马。连续几个月都要开工，搞到连小朋友都唔认得我，望住我感觉好陌生。最初因为唔舒服连我抱佢都喊，只系可以畀熟悉嘅妈咪同工人姐姐抱，现时喂完药就揽住佢瞓，摄位发放多小小父爱。」


凑女心得开心Share
新手爸爸展鹏又开心share凑女心得：「个女好乖，唔会扯口罩，因为我会谂办法𠱁佢玩住嚟戴口罩，戴咗后再赞吓佢，影吓佢，等佢觉得戴口罩系件开心事，但要小心唔好整痛佢。其实小朋友对每样未接触过嘅嘢都好新奇，尤其当小朋友想扯走口罩会被弹亲，以后就会惊咗唔敢再戴，所以要小心处理第一次。」讲到喂小朋友食药，展鹏强调「尽量唔好掂到条脷，食完用水冲口，最重要嘅贴士系分开嚟喂，每隔半小时喂一种药，可能喂药需时好长，但小朋友唔会咁抗拒。家长们亦留意，要控制自己，因为小朋友只系识睇反应，对住小朋友时面容同语气都要欢容啲，唔好咁紧张，所有嘢互动多啲，好似做呢行咁要八面玲珑，就算话佢都要笑住嚟话，哈！虽然我成日『濑嘢』畀人话黑口黑面，但对住屋企人梗系唔同啲啦。」问到咁有育儿心得的展鹏会唔会尽快生多个？展鹏笑言，「我哋呢啲唔会目标为本，要长做长有，享受咗『小猪比』先，反而最大嘅新年愿望要喺事业上重新再出发，因为过去年多，喺人生阶段里面做咗好多样好重要嘅嘢，𠵱家所有嘢都settle好，要再努力冲刺喇。」