【头条独家】鼠年放闪甜爆男友爱得痴缠 「登七」家燕姐怕丑唔玩激情

自1996年为TVB拍连续剧《真情》开始，「好姨」薛家燕旺足24年，连续3年喺《开运王》系列贺年节目助阵外，深夜时段都重播她6年前主演的作品《新抱喜相逄》。家燕姐坦言今年会Keep住旺，事关经理人珊珊(囡囡石佑珊)经已将她的schedule排到满满，年底前都好full！提到去年中秋节时自爆因为约咗男友食饭甩底险情海翻波，家燕姐笑言啱啱箍煲成功，可担心再被诈型？家燕姐带点尴尬笑容作出承诺：「呢啲我会搞掂。」更怕丑表示年纪唔细，拍拖不能太激情，「淡淡咁牵挂对方就OK。」采访：方骞平

年半前，薛家燕扬言待完成红馆《爱你无限60年演唱会》后，便会减少工作抽多点时间陪伴等足14年的圈外男友「A君」，但新一年工作量唔会比以前少，对于再食言，家燕姐急急解话：「我赞成珊珊帮我接多啲show，一来年纪大，二来喺呢个时候仲有机会做节目，令到大家开心，其实系我哋荣幸，我哋福气，如果平日唔使做嘢，留喺屋企都唔知做乜好，又冇收入，𠵱家入厂好开心，食饭有人陪倾偈，节目又有人睇！」在旁的黎诺懿即反问：「家燕妈妈你点会冇收入呀？你瞓紧觉都喺度搵紧钱㗎喎！你唔好呃我喎！不过，我成日同家燕妈妈讲，工作、家庭、健康系要取得平衡，要够休息先好，艺人有工作系福份，我都试过低潮期望天打卦嘅日子，𠵱家开始成熟，唔似得年青人系咁冲，都开始要取舍。」

讲男友欲言又止

对于家燕姐的选择，「A君」可会有微言？家燕姐大笑说：「呢啲我会搞掂佢，今年会搞得妥妥当当，年初七开工前抽几日时间陪吓佢去玩，咁平时我哋都时不时见吓面嘅，因为我哋呢啲年纪(3月30日「登七」)感情唔好太浓，太浓自己抽唔返出嚟好麻烦㗎，淡淡咁牵挂住对方，久唔久一齐食吓饭，讲吓心事咪好罗。不过，佢同我嘅睇法好唔一致。」问到男友是否对她太痴情时？家燕姐一脸靦腆，欲言又止说：「又唔系，点讲呢，真系唔识讲！」黎诺懿见状取笑她说：「家燕妈妈好少会咁喎，你都有嘢唔识讲？平时冇㗎喎！」回复少女心模样的家燕姐说：「哈！点讲呢，我哋互相慰寂啦。」为怕被追击恋情，家燕姐即转话题，透露师傅指她年年桃花，但属于观众缘啫！

问黎诺懿想家燕姐拍多啲拖定做多啲嘢？家燕姐却抢答：「拍拖都要选择性，我要搵黎诺懿、黄祥兴（原名黄长兴，另名黄致豪）帮手过吓目，因为佢哋系人办，两个都好爱锡家庭及子女。」黎诺懿乘机澄清唔系懦夫：「师傅成日话我哋怕老婆，我哋唔系怕老婆，系尊重老婆、锡老婆，女人娶返嚟系要锡嘅。」家燕姐忍唔住开心share：「我男友都好尊重我㗎，唔尊重我唔会等咁耐。」

同香港共度难关

讲到新年愿望，家燕姐希望香港运势好转：「面对逆境，我哋系要努力奋斗，唔好有乜怨言，尽我哋能力去做啦，希望一呼百应过度到呢个难关。去年虽然工作量不变，但收入减少咗，收个价系平咗啲。」黎诺懿表示认同：「呢段时间收平少少，又带到欢乐畀人，我觉得ok！」黄祥兴点头和应：「大家明白处境，共度难关啦。」