【头条独家】老公抱女急步行 吴日言追到变晒样

话咁快曾经嘅冬菇头吴日言(Yan)已经36岁，结咗婚三年，仲有个女林禧茹（Beatrice）。两公婆拍拖20年，中间曾经分开然后复合就结婚，家阵阿Yan系一间日式饭团店嘅老板娘，成日喺铺坐镇，好亲力亲为。日前夜晚六点，吴日言一家三口去咗铜锣湾希慎拎蛋糕，老公Barry Lam抱住女系咁行，阿Yan就系咁跟住，见吴日言跟到变晒样，好心阿Barry行慢少少啦。 采访:梁志明

去年12月初，吴日言有份投资嘅日式饭团店开幕，佢透露开幕活动因为社会气氛不稳而一度改期，开业一个月坦言生意麻麻，但佢话会咬紧牙关与香港市民同心度过艰难时期。

下次等埋老婆啦
铺头唔太忙，吴日言就同老公同个女去铜锣湾行街，Barry全程抱住个女，阿Yan就一直跟住老公行，佢哋由时代广场行去希慎，不断上电梯后到达一间蛋糕店，阿Yan拎单出嚟等攞蛋糕。重点系，由时代广场开始，两公婆一个行前一个行后，一家之主抱住个女行得好快，吴日言面有难色跟得几辛苦，但Barry无乜点等老婆，至去到希慎搭自动电梯时先会望吓老婆，难怪吴日言见到老公笑得咁敷衍。