【头条独家】做足34年男主角张兆辉勉励年青人唔好太计较

2020-01-16 00:21

TVB经典60集长剧《黄金十年》系张兆辉第二部担正男一的剧集，相隔34年，新剧《黄金有罪》仍然系辉哥做男主角。剧中辉哥有好多动作镜头，同黄智贤(阿Ben)、萧正楠及吴岱融等打到飞起，又要演绎多面人格，真系好考演技。对于做足34年男主角，辉哥奉劝年青人唔好怕辛苦同埋斤斤计较，因为当年前辈教落：「当你努力过，便会有回报！做人最紧要唔好同人比较，知足常乐，做好自己。」采访：方骞平服装：Giorgio Armani 化妆：雷淑贤

张兆辉凭电影《催眠．裁决》先后获《2019国影年度表彰盛典》「最优秀电影男演员奖项」及《第11届澳门国际电影节》「最佳男配角」，演技受肯定，不过，喺TVB新剧《黄金有罪》中饰演嘅荣木桐，利用唔同手段达成目的，对辉哥来说都系一个挑战，连监制王心慰都赞他发挥到角色嘅性格。他说：「角色亦正亦邪系有好大发挥，因为唔系我本身性格，今次可以过足戏瘾。但接咗先发现有好多动作场面，好似泰国外景咁，要营救爸爸，抢钱救朋友等，又要同阿Ben、萧正楠搏斗，哈！打阿Ben好有乐趣，可以凭经验真打，打到道具棍都断埋。」

努力Keep住状态
提到同黄金剧名好有缘，当年凭第二部担正做男一嘅《黄金十年》爆红，辉哥笑说：「嗰套剧系讲年青人初出茅庐，𠵱家演事业有成，出人头地嘅股坛大亨，感觉好似成长咗，前后呼应咁。(当年拍档刘嘉玲、张卫健都仲系做紧主角喎！)有咁嘅成绩，大家都得来不易，都要keep住最佳状态，但奉劝年青人，唔好斤斤计较，努力做好件事，享受咗过程先，正如前辈话斋：『当你努力过，自会有回报，但唔好心急。』因为冇人知将来会点。」