【头条独家】带妻女齐赴新西兰拍MV　陈柏宇兴奋阿女无扭计

陈柏宇（Jason）早前为拍新歌MV远赴新西兰取景，仲带埋太太符晓薇（Leanne）和女儿Abigail同行，虽然往来拍摄地点舟车劳动，但囡囡都完全冇扭计，事关Jason好识做，一有空档即带爱女去踏青、睇动物，乐在其中的他都话出Trip有「囡」陪好开心！采访：黎宝伦

陈柏宇去年底推出新专辑《Anyone But Jason》，唱片公司更大手笔让Jason与团队远赴新西兰10天，为新歌《本能寺》、《最后一个收费亭》拍MV，其中大队仲去到激流岛的乱石岗、Owhanake Coastal及Orapui Road等地取景，能够一睹大自然美景，首次去新西兰的Jason固然兴奋，但都不及太太符晓薇和女儿Abigail能够同行咁开心！

由于今次拍摄地点路途遥远，拍摄团队每日都要一早出发，其间搭车又搭船，来回都要4粒钟，幸有一大班哥哥姐姐陪玩，Abigail也没有扭计，Jason笑谓：「虽然今次长途跋涉，但因为长期都好热闹，囡囡每日返到屋企即刻瞓，所以一啲来都冇扭计，正！」他又自爆除了头三日行程较紧密外，其馀时间都好Relax，一家三口仲有机会去踏青、睇小动物，「好少出Trip拍嘢系咁『他条』，我哋成日都有得瞓晏觉，同埋好多时间去玩，我哋仲去咗睇羊同马，个女都玩得好开心！」

难得景色优美，Jason亦充当摄影师为妻女影相，惜他经常捕捉别人的「NG Look」，今次仲连手指都「乱入」，Leanne都忍不住寸爆：「陈生摄影技术又高咗。」见当中有些相很有专业水准，问他是否亲自操刀？Jason即避谈笑道：「有时老婆影，有时我影罗，其实𠵱家电话科技好好，就算本身影得唔系好靓，只要有部电话就帮到手，有电话就无敌㗎喇！」