【头条独家】34C「咪神」走晒样 欧阳巧莹谷肥自己Ready大肚

《3日2夜》「咪神」欧阳巧莹（Tammy）外型甜美又有34C火辣身材，有好多巴打Fans㗎。不过，32岁嘅Tammy突然「封胸」，仲话今年3月约满TVB后退出幕前全力做「生仔机器」，讨论区一地眼泪！Tammy日前陪老公林师杰(木偶哥)出席《识玩旅行团2》庆功宴唔多妥，因为佢嘅身材明显走晒样，唔只胀爆，腰粗兼肚凸凸，女神变师奶，疑似大肚，但两公婆坚称唔系有喜！采访：方骞平

欧阳巧莹之前喺TVB剧集《金宵大厦》单元《洞》中饰演网红「Baby Mia」，大骚事业线成为网民热话，但她坚持唔再留恋幕前。日前她陪老公林师杰出席《识玩旅行团2》庆功宴时，脚踏平底鞋及穿松身衫裤，虎背熊腰更明显。因为身形由细码变大码，难免惹起在场人士误会，起哄追问她几时生得？两公婆就好尴尬否认有咗。不过，记者留意到，林师杰全程小心照顾娇妻，仲温柔地问：「食唔食呢啲？」而Tammy食得好清淡，唔掂煎炸嘢同海鲜，只拣食鸡同菜及饮热茶，后来先饮两啖橙汁汽水，明示自己唔使戒口。

婚后日日食同瞓
追问Tammy为何走晒样？她边搓肚边说：「因为开心，日日食同瞓，𠵱家食好多维他命，营养充足咗，不过，我真系开始受够，我系肥咗又点呀？外间见我肥少少就误解，好似头先一入场，所有台前幕后问我几时生？我系因为冬天着多两件衫，唔系有其他原因，次次同朋友去食饭拣食辣嘢，朋友即喝止：『你食唔食得㗎？系咪饮得冻嘢㗎？』我想讲，其实我系得㗎。」Tammy更忍唔住狂呻表示前年11月结婚时被指奉子成婚，半年前又有报道称她有喜，任凭Tammy点样解释都无人信。林师杰笑说：「大家太敏感喇，唔好畀咁多压力佢啦，咁样好难搞，我哋系好想呀，拍拖一年已好想有小朋友。」Tammy强调：「告别《3日2夜》、告别娱乐圈系真嘅。呢排唔系好得闲，真系未得（闲）住(造人)，做咗自己要做嘅嘢先，生仔随缘啦！」


唔靓就唔想蒲头
听到老婆讲退出娱乐圈，林师杰即说：「其实佢意思系想搞吓其他嘢先，短时间内唔会再拍节目，佢做妈咪喇。」口快快爆料的木偶哥即时更正：「佢系准备紧做妈咪，所以外形上未必做到节目。」愈爆愈多，林师杰都忍唔住大笑。木偶哥又爆老婆退出幕前，系因为偶像包袱太大，「佢唔索唔靓就唔太想出嚟，而且佢向来走健康性感，Keep唔到就唔好出嚟嘞。」Tammy点头同意：「因为我对自己有要求，想以最完美嘅身形出现幕前，所以你要加油（搵钱）喇！」对此，林师杰即笑言：「我又唔可以再靓仔啲，咁唯有写多啲歌嚟搵食。」