【头条独家】唔怕死碌落山谭俊彦瞒住家人拍剧玩命

2020-01-02 23:00

39岁谭俊彦（Shaun）继两年几前拍《特技人》亲身上阵拍飞车、爆破、碌落山等惊险场面后，喺王心慰监制的TVB新剧《失忆24小时》中再度玩命！本报记者日前直击Shaun喺大帽山山顶拍一个大结局重要场口，见他唔用替身，滚落20-30尺高的山坡5至6次，因为斜度十足，拍得触目惊心，在场剧组都战战兢兢，唔敢松懈。谭俊彦否认卖命系为咗搏台庆奖，强调趁后生，做到就做，笑言搵食艰难。采访：方骞平、李权威

当日谭俊彦和郭晋安同场，剧情讲两人都一齐碌落山坡，但及时抓住棵树，大难不死。虽然有晒替身stand by，但Shaun为求逼真坚持落手落脚做，反观安仔脚部有伤患，不宜亲身上阵，只系坐喺斜坡度补文戏。现场山坡陡峭，要拉住条安全绳上落，而且系泥地，沙石又多，碌落山容易刮伤，不过，Shaun垫好私伙pad兼度好位后，一鼓作气话碌就碌，拍得相当精彩，但拍第一Take时曾失手，脚部撞向树干擦损及撞瘀晒，痛到全日都跛跛吓。他坦承真系有啲危险嘅，连特技人都叫他唔好自己拍，不过，相信有好嘅保护装备会帮到手，同埋有经验就ok嘅，「拍前我瞒住老婆同老窦（狄龙），爸爸一定唔赞成，系我『牛精』要坚持，呢啲唔系叫搏命，系叫专业，可能细个拍电影时都系咁做。好多人话拍TVB剧唔使咁认真，我觉得又唔系嘅，其实作为演员好难避免拍呢啲镜头，好似《包青天》、《特技人》都有危险动作，我觉得做到咪做罗，再老啲就做唔到㗎啦！不过，个特技人都话叫我畀口饭佢食，叫我唔好自己嚟，所以我都系拣咗其中一个比较重要啲镜头，要捉住棵树，见到个样嘅镜头嚟碌。拍完晒我先够胆畀老婆知，仍然俾佢闹咗好耐。」