【古天后日志】轻资产及新经济股来年继续sharp醒

12月31日，大致多云，有几阵微雨及有薄雾，晚上气温较清凉，出去迎接元旦著多件衫喇。差O的以为美股只系识升唔识跌，但隔晚美股出现回吐，三大指数周一受压，跌幅大约系0.6%左右，讲真相对近日升势，隔晚回吐压力唔算大。截至上周五为企，标指累计升幅已近三成，嚟到现水平估值唔算平，出现回吐亦好正常。港股隔晚ADR及夜期亦随之回软，齐齐跌逾百点。目前恒指喺新加坡黑期亦跌逾百点，喺28200水平徘徊。 上星期古天后都有留意到，金价连日回升，隔晚国际金价升势持续，连升五日并创近三个月新高，见每安士1518美元。金价回升反映资金开始倾向避险，不过元旦假期在即，即使资金唔避险，喺股市减磅亦系人之常情。总结今年古天后所推介过嘅股份，表现都唔错，喺年初唔少所谓专家对2019年港股预测悲观嘅同时，古天后以炒股唔炒市嘅策略应对，一年落嚟总算有斩获。 讲真古天后好少对每年指数进行预测，因为中O左系好彩，唔中系应该，尤其喺现今资讯高速流转及爆棚年代，股市走势更受个别消息影响，以技术走势作预测相对更为困难。不过今年第二季之时，曾接受杂志访问，当时古天后已表示，恒指高低位已出现，结果望番转头，低位正正系今年1月初嘅24896点，而高位就系4月嘅30280点，果然及后港股已再无突破呢两个高低点。 而访问中亦曾预测，今年医药股、物管股及内需股可以喺下半年继续跑赢，结果呢三个板块表现都算系咁，虽然下半年医药股受累带量采购及药品降价所影响，第四季表现平平，但拉匀一年睇，医药股仍录得相当可观升幅，中生制药(01177)更以逾一倍升幅，成为今年表现最佳蓝筹股。 至于古天后亦预测到中美贸易谈判将持续，双方关系唔会恶化，谈判并唔会破裂，甚至做个样可以达成部份协议，结果中美双方果然喺拉拉扯扯之下，达成初步协议，并于1月进行签署。正因为咁样，人民币嚟到年底仍终于逼近番七算水平，兑美元失守七算后，并未有一泻如注，A股近期反见回勇。正因为睇漏O左人民币表现未至太差呢个因素，今年都算系走漏眼O左内房股呢个板块，板块内唔少股份创新高，呢一点确承认有O的跌眼镜。 年初睇好5G概念股大炒，结果呢个板块系年头跟第一季攞晒彩，跟住就一直向下沉，直至近日先叫翻炒，呢一年睇番其实年头年尾只系打个平手。反而晶片股及手机设备股就愈炒愈有，先低后高。而年近呢个几月，新股可以话系市场焦点，几乎所有新股上市都有唔错表现。值得留意今日开始招股嘅艾德韦宣(09919)，噚日开始路演竟然邀请倒刘嘉玲大驾光临，而嘉玲姐更加表现会身体力行入飞参与，呢只新股应该都有一定睇头。会唔会好似今日挂牌嘅赤子城(09911)未挂牌暗盘就录得近倍升幅，古天后无水晶球答你唔倒，但抽得中艾德韦宣，应该都有份新年礼物收吓。 展望来年港股可能同样要用番炒股唔炒市呢个策略，继续随资金流向追逐唔同板块，而来年轻资产及新经济股，将会继续系焦点。今年港股大除夕只有半日市，提早收炉，祝大家来年喺股市继续有斩获。 古天后 (徐狄怡，证监会持牌人)