【头条独家】离婚19年 唔谂再嫁畀阿女挑机 叶蕴仪：佢话快过我拍拖
2019-12-29 22:30 
46岁叶蕴仪（Gloria）最近演出ViuTV真人骚，同一样有过失婚经历的薛世恒齐齐为《一切从失婚开始》到乌克兰拍摄，两人除了四围参观，接受不同挑战，仲大讲失婚经验及感受。离婚19年的Gloria话，谂起当年凑住对仔女都好旁徨，想过重操故业再拍戏，但最终决定发展新事业，为做仔女榜样更决心读返书，虽然一直有人追，但她为了仔女着想坚持做单亲妈咪冇谂过再嫁，不过仔女现在已长大，20岁细女仲好支持妈咪再觅第二春，更用另类方式挑机当鼓励同妈咪讲：「我谂到我拍拖，你都应该未拍拖啦！？」细女咁讲令Gloria哭笑不得，但未有想快啲搵个伴，反而是仔女长大了，她想好好享受自由日子做返自己。撰文：杜淑霞 摄影：李维隆 场地：Hyphen Party & Event
回想2000年，Gloria跟结婚5年的陈柏浩离婚，27岁的她带住只有4岁的大仔绍臻和1岁的细女绍珩，坦承当时前路茫茫，「第一刻当然好震撼，但系慢慢要游说自己继续向前行罗！对于我嚟讲细路仔系动力嚟。」离婚后，她都有想过重返娱乐圈发展，但最终坚持自己谂法，「我个人比较任性，觉得我想试第二啲人，因为好多人都觉得你应该入返呢行，相对容易啲搵钱呀，或者容易啲适应呀，但对于我嚟讲，人生可能过咗四分一咁样，我系咪应该试下唔同嘅嘢呢！？唔系一定要做返之前嘅嘢㗎嘛！我仲有好多机会去尝试唔同嘅嘢，到开始做唔同工作之后，我又觉得我要做一个榜样畀我啲细路仔睇，我以前拍嘢只系读到中五，想话畀啲细路仔听，想做就会做到，所以去读Art拣样自己锺意读嘅嘢，由学士到硕士一路完成佢，畀一个身教啲小朋友，妈咪想做嘅嘢，畀心机都会做到嘅，你哋如果有嘢想做，应该朝住自己目标去做。」
为子女放弃再婚
当年Gloria跟前夫认识未够一年就闪婚，她觉得相处不久并非导致离婚主因，「我觉得人系会改变嘅，但系有啲人变都系会维持个婚姻，有啲人系唔会变嘅，所以系睇番嗰个人本身，我觉得唔关识得耐唔耐嘅事，系大家珍唔珍惜呢个关系，双方进行一个磨合。」Gloria坦承一直有人追，但为了一对儿女从来冇想过再婚，「我唔锺意畀个复杂嘅环境畀小朋友，就算系单亲都冇乜问题，畀到一个啱嘅价值，同畀到爱佢哋就得，唔需要专登搵个阿爸或者阿妈畀佢哋，呢一代单亲真系好普遍。（唔再婚系咪牺牲？）我唔觉得系牺牲嚟，人生实在太长啦！你同小朋友相处其实好短，佢哋需要你嘅时间好短，所以唔会觉得嘥咗，同佢哋一齐嘅时间重要啲。」
对象唔拣艺术家
现在大仔已23岁，细女都20岁入埋大学读书，Gloria坦承现在已甩难，可以做返自己，譬如搞艺术工作或者尝试不同幕前演出，反而冇谂拍拖住，「未准备好接受一段新感情，好享受细路大咗，我甩身做吓自己嘅嘢，有另一半就顺其自然。（再拍拖仲谂唔谂结婚？）唔谂咁远，大家唔好畀压力大家。」Gloria唔心急拍拖，反而细女替她着急，「又唔系哦嘅，有一个讲啫，妹妹讲『我谂到我拍拖，你都应该未拍拖啦！』哈哈！佢咁样比喻，即系话佢会快过我罗！佢应该系想我扩濶生活圈子识多啲男仔。」讲到择偶条件，她反而唔希望对方一样是艺术家，「佢唔使锺意艺术，佢接受我做呢样嘢就得，如果都锺意艺术好难倾得埋，大家都系会好固执呀，好有自己谂法，咁就仲沟通唔到，我觉得嗰个人应该系欣赏我嘅工作嘅，接受我嘅，畀多啲自由度我。（使唔使过小朋友嗰关？）以前就要，依家唔使，太大啦，以前我主要会谂小朋友先。」
最新回应