【头条独家】自爆曾被「咸湿婆」非礼 江嘉敏学跆拳道防狼

TVB上位小花江嘉敏（Kaman）下个月才开剧，难得轻松放大假，Kaman却选择学嘢增值自己，啱啱报考电单车1 take pass强制试，又学紧跆拳道，上咗几堂经已去到黄带级数，她一脸满足地说：「学完可以健康啲，必要时又可以防吓狼！」原来入行前她试过喺港铁车厢被摸Pat Pat，摸她的竟然是一位姨姨咁款嘅「咸湿婆」，因为呢段不快经历，提醒她要去保护一吓自己。采访：方骞平

25岁的江嘉敏多才多艺，以前就学弹琴、画画，长大后就学跆拳道、揸电单车，全部都系自己想学的，尤其跆拳道，拍剧都有用，「之前拍《夸世代》时我畀张继聪挞过，又挞过对手，感觉相当过瘾，所以好想去学。啱啱上堂时打到成个人散咗，不过真系瘦咗，条腰少咗1寸，本想学埋埋身战术，但男友Anthony唔批准，话要预埋佢先好去学，所以我改咗学好有型嘅踢板，学跆拳道佢又唔怕我变粗鲁，哈！但返屋企，我都有拎佢个patpat当沙包踢嚟练习㗎！」

呢世都记得
问到可曾试过被性侵，所以要学防狼术？Kaman坦言入行前试过喺港铁被非礼，真系讲起都嬲爆：「当时车厢都几迫，有个正正常常look嘅『姨姨』摸我条腰再摸我patpat，因为对方系女人，我不以为意，以为太迫佢先会掂到我，跟住我就喺下一站，行咗去下一卡车厢，点知佢跟埋嚟，过一阵又再摸，我咪开声问：『摸够未？』点知仲畀佢大大声闹返转头：『我系女人，点会摸女人？你有病就去睇医生啦！』真系嬲死我呀，佢闹完我之后就落车，摆明系心虚。(当时著短裙仔好诱人？)唔系呀，著tee同牛仔裤。」呢件事令她留下永不磨灭记忆。