【头条独家】堕海意外一度失去意识 余安安撞断肋骨唔笑得

60岁余安安日前由家佣姐姐傍实出席新片《失踪》首映礼，原来之前她曾意外堕海，「堕海后翻咗几个筋斗兼撞断咗几条肋骨。」但问到详情，安安姐话断咗片唔记得，因为受伤后晕咗，过咗一段短时间先醒返，有知觉时已被送院。经此一役，安安姐和戏里戏外仔女关系更紧扣，两个亲生囡囡多咗返屋企陪她食饭，『阿囝』凌文龙及『阿囡』锺欣潼（阿娇）就送上温暖的问候。采访：方骞平

处于康复期的「索妈」余安安精神爽利，不过，因为受伤冇得做运动令她「箩箩挛」！安安姐话最初剧痛：「唔可以大笑，咁会chok亲肋骨，尤其咳嗽，嗰啲痛足以令到人喊。𠵱家行路都变得生硬，要搵个咕𠱸顶住个背坐，其实我系个好心急嘅人，平时动作好快，𠵱家成日畀人闹我要放慢啲，但好怕变咗慢动作咁，好彩两个女好生性，多咗返嚟陪我，家佣姐姐多年嚟系我生活上好拍挡，好知我有乜需要，有佢哋就唔怕冇人照顾。」

同戏中仔女好感情
而戏中仔女凌文龙及锺欣潼都好关心安安姐，相距16年再同阿娇合作，安安姐大赞变成人妻的阿娇无咗当日份稚气，反而添上成熟，好识得照顾人：「有乜靓嘢佢会介绍畀我，好sweet。我哋会倾吓套戏，交流得几好，好有火花，今次见到佢有内心戏。反而同阿囝小龙得一分钟对手戏，但两人好珍惜呢分钟演出。」她又指跟戏中一众『囡囡』如阿娇、文咏珊及薛凯琪关系唔太好，但戏外却好亲蜜，而且她脚头好，阿娇、JM同样嫁得好，只等紧Fiona的好消息。