马会创先河投注站开茶餐厅 马迷边观赛边叹美食随时落注

好多马迷去马会投注站买马仔，都会去附近茶餐厅饮吓奶茶、食个包，如果投注站里面有埋茶餐厅就好罗。呢个梦想终于成真啦，马会大搞新意思，首创在北角电气道投注站楼上开茶餐厅，马迷可以一面睇住赛事同赔率，一面享受美食，然后去柜枱或投注机落注。马会咁有心思，抵畀个Like。　

北角电气道投注站内的茶餐厅，名叫「永胜冰室」（英文为Wins Cafe），够晒好意头。卢骏投注完想入去食lunch，百几个位已经满咗九成，好辛苦搵到个位，见到装修新净不在话下，仲装咗多个屏幕，可以睇住赛马直播及足球赛事同赔率。投注柜枱就在旁边，又有投注机，极之方便。

食食吓嘢，卢骏仲见到马会主席陈南禄同零售及电话投注主管Grace嚟巡视。Grace话呢个地方原先是办公室，马会见马迷有需要，就地尽其用，开咗呢间冰室，系投注站内开嘅第一间餐厅，装修都花咗好多心机，开张只大半个月，已好受马迷同街坊欢迎。

卢骏同朋友试咗茶餐厅嘅黑松露炒蛋菠萝包、肉燥茄子猪扒饭、西多士同红豆冰，都好唔错。原来负责营运的Studio City，经营多家餐厅，好有经验，难怪水准咁高。

卢骏
维港会