阿碌开咪｜「0+7」政策系失血政策？

睇走势，好快「0+7」会实行，再松多一步。效果会点，尚待观察，因「3+4」后，来港游客未见增长。

将心比己，全世界咁多美丽城市已通晒关，唔使打针唔使撩鼻唔使戴口罩唔使隔离唔使乜码物码，你系游客，你会否愿搞到成身汗来香港旅游？

答案当然系——No！所以，「3+4」对旅游业，根本冇帮助。唯一，系必须来港工作、经商，又或急需回港探望家人者，无奈接受。

　好嘞，「0+7」又如何？小弟问多位旅游业内人士点睇。一致指出：「惨！香港势必大出血，兼且流血不止！」

何来此话？正因香港人，尤其中上收入者，已滞在香港三年，冇得郁。哗！若一旦回港唔使坐「防疫监」，仲唔飞身作报复性旅游？一个系咁，一百个系咁，一千个系咁……一万到十万个都会系咁。

呢班报复性向外的旅游大军，你话嘞，会使走几多香港钱？必定天文数字，深不可测！

事实，我身边已有N个老友卜定半年机票，将三年的旅游费一次过环游世界，由日韩泰国开始，再到欧洲澳洲，然后美加！

咁呢个「0+7」政策，咪变失血政策？

找二○○三年揸Fit专搞Inbound旅游的业界高人问：「老哥，可以点搞返旺香港呢？你最富经验噃！」

「碌Sir，呢单野，并非旅游界问题，是整个香港问题！当年沙士之后，不少城市为抢游客，一通关，立即津贴航空公司推出廉价机票，津贴酒店大减价，与所有主题乐园议定游客入场大折扣。总之，游客就是财神，一定要用尽方法吸佢哋来消费，以谷起个势。所以，一定要由政府最高层统筹及出手。若果全面开关在望，今日就要立即开始做野！尤其航空公司都停摆咁耐，冇三两个月，根本难以起动！」

其实跑马也是香港吸引游客的重点，尤其快活谷！今晚全捧沈厩：「包装风云」、「想见你」、「人和家盛」及「日辉煌」！

曾智华

阿碌开咪

 

编按原题为「游客就是财神」